Shillong, Nohprah 15 : Ki nongtrei jong ka KHADC ki la pynpaw ïa ka jingkmen kaba khraw hadien ba ki la ïoh pdiang ka ka Dearness Allowances (DA) kaba naduh u Kyllalyngkot 2023 haduh u Jylliew 2023 kaba kot haduh Shi Klur tyngka.
“Ngi pynpaw ka jingsngewnguh kaba khraw ïa u CEM Bah Pyniaid Sing Syiem bad ïa ka Executive Commitee baroh kawei kaba la sngewthuh ïa ka jingdonkam jong ki nongtrei khamtam ha ka jingpynkhreh na ka bynta ka samoi Khristmas,” ong ki nongtrei ka KHADC haba kren bad ki lad pathai khubor.
Khlem da kwah ban pynpaw kyrteng kitei ki nongtrei ka Council ba kynthup naduh ki ophisar haduh kiba bat ïa ki kyrdan kiba kham rit ki la pynpaw ba kane ka jingshimkhia jong u CEM ban pyllait ïa ka DA ka la pynkmen haduh katta katta ïa ki namar ka la kylla long kum ka jingai sngewbha Khristmas.
“Watla ka dei ka hok jongngi kaba ngi dei ban ïoh, hynrei ngi sngew pat ba ka jingai ha ka por kaba ngi donkam bha ka long kum ka jingkyrkhu kaba khraw ïa ngi watla ngi tip ba ka Council ruh kam don ha ka jingpahuh ka pla tyngka,” ki la bynrap shuh shuh.
Kumban shu kdew hangne ki artylli kiwei pat ki district council ha ka jylla kynthup naduh ka JHADC haduh GHADC ki la mad ïa ka jingkyrduh pisa kaba khraw haduh ba ki shem jingeh ban siew tulop ïa ki nongtrei.
