Kitbok u Myntri ïa ki nongïalehkai ban leit ïashim bynta ha ka Khelo India Youth Games ha Haryana
Shillong, Jymmang 27: U Bah Banteidor Lyngdoh Myntri Sports and Youth Affairs ha ka sngi Thohdieng u la kitbok kitrwiang ïa ki nongïalehkai ba kynthup shynrang bad kynthei haswa ba kin mih na la ka jong ka jylla ban leit ïakhun ha ka lympung ïalehkai Khelo India Youth Games, kaban long ha Panchkula, Haryana naduh ka 3 tarik haduh 14 tarik Jylliew 2022.
Ïa kane ka prokram ba la pynïaid da ka Directorate of Sports and Youth Affairs, jong ka sorkar Meghalaya la pynlong ha madan football jong ka SAI kaba don ha NEHU Campus, Shillong.
Haba ai jingkren ha kane ka jingïalang, u Bah Banteidor Lyngdoh u la ong ba ki nongïalehkai kiban mihkhmat ïa ka jylla kidei ban long kiba ryntih, trei shitom bad ïalehkai bha khnang ban wanrah ïa ka nam bad burom ïa la ka jong ka jylla. U la ong ruh ba ka Meghalaya ka la dep ban pyntreikam ïa ka sport polisi kaban long ka jingmyntoi na bynta ki nongïalehkai dang khie bad ban kyntiew ïa ka kam ïalehkai hapoh ka jylla.
U la ai khublei ruh ïa ki synjuk pynïaid ïalehkai, ki coach bad ki nongïarap kiba la trei shitom ban ïarap ha kaban kyntiew ïa ka sap ka phong ki nongïalehkai ha ki lympung ïalehkai national kum ka Khelo India Youth Games.
U la ai mynsiem ruh ïa ki nongïalehkai jong ka jylla kampher la ki jop ne rem hynrei kaba kongsan kidei ban don ka mynsiem ïakhun ban kynjoh sha ka thong.
Ki nongïalehkai jong ka jylla kiban leit ïashim bynta ha ka Khelo India Youth Games ki don 32 ngut bad 10 ngut ki official ha ki saw jait ki jingïalehkai ba kynthup ha ka Football, Athletics, Judo, Swimming bad ka Boxing.
Ka Football ka la ïoh rung lypa sha ka quarter-final ha katei ka lympung katba ki saw tylli pat ki ïoh ban rung lyngba ka Wild Card. Ïa kane ka kynhun yn ïalam da u Kong Darlene M Khonglam kum ka Chef De Mission bad ka Kong Yolinda Hynniewta, kaba dei ka coach Basketball jong ki Junior kum ka Manager.
Ka kynhun ïalehkai football kan mih na ka jylla ha ka 30 tarik Jymmang 2022, ka Athletic ha ka 2 tarik Jylliew, ka Swimming, Judo bad Boxing kin mih ha ka 5 tarik Jylliew 2022.