Kitbok kitrwiang ka MDCA ïa u samla Maitshaphrang Kharwanniang
“Shwa ban un leit ïashimbynta ha ka UCI MTB Eliminator World Cup 2022”
Mawkyrwat, ‘Nailar 25: Ka Mawkyrwat District Cycling Association (MDCA) da ka mynsiem jong ka jingsngewsarong bad ka jingkitkhlieh na ka bynta uwei na ki dkhot jong ka association shwa ba un sa mih ban leit mihkhmat sha ka Union Cycliste Internationale (UCI) Mountain Bike (MTB) Eliminator World Cup 2022 ki la pynlong ïa ka jingïalang ban pynkup burom ryngkat ki kyntien jingkyrkhu kyrdoh ha ophis treikam jong ka association.
Ka jingleit ïashimbynta jong u Maitshaphrang Kharwanniang uba dei na ka shnong Kenïong kaba hap hapoh jong ka South West Khasi Hills District ka dei ha ka UCI MTB Eliminator World Cup 2022 ha Ladakh ka dei lyngba ka jingdon jong u ha ka Silver Medalist ha ka Cycle Race jong ka 4th Meghalaya Games 2022 ha Nongbah Shillong.
U samla Maitshaphrang Kharwanniang ha ka jingkren jong u, u la pynpaw nyngkong eh ka jingainguh ïa U Blei Trai Kynrad Uba la ri la sumar ha ki por baroh bad U ba la ai ha u ïa ka sap ba kyrpang ban long uwei na ki nongñiah cycle uba tbit. Ha kajuh ka por u la pynpaw ruh ka jingaikhublei na ka bynta ki nongkitkam jong ka MDCA kiba la ju long ki nongaimynsiem ha ki por baroh. “Nga poi haduh kane ka bynta ba ngan sa leit ïashimbynta ha ka UCI MTB Eliminator World Cup 2022 ha Ladakh, dei lyngba ka jingaimynsiem ka jong phi baroh”, ong u samla Maitshaphrang.
Ha ka jingkren na ka liang u bah Ambrose Thongni, President jong ka Mawkyrwat District Cycling Association (MDCA) u la ai khublei nyngkong ïa baroh ki dkhot jong ka MDCA bad ki bym dei ruh ki dkhot jong ka ruh, ki nongñiah cycle na kylleng ka South West Khasi Hills District bad ki bym dei ruh ki cyclist kiba wan ai mynsiem ïa u samla Maitshaphrang Kharwanniang shwa ba un mih noh na distrik ban leit sha ka Union Cycliste Internationale (UCI) Mountain Bike (MTB) Eliminator World Cup 2022 ka ban sa long ha Ladakh, India ha ka 04 tarik u bnai ‘Nailur, 2022 kaba dei ka First Eliminator World Cup ba ki la jied ban long hapoh ri India.
Namarkata, kum u President jong ka association u ai ka jingkitbok kitrwiang ïa u Maitshaphrang Kharwanniang u ba dei u Silver Medalist ha ka Cycle Race jong ka 4th Meghalaya Games 2022 bad u ba la shah jied ruh ban leit ïashimbynta ha ka Union Cycliste Internationale (UCI) Mountain Bike (MTB) Eliminator World Cup 2022. “Katno ngi sngewtynnad na ka association ki ïoh ban pynmih ïa uwei na ki cyclist napoh ka South West Khasi Hills District jong ngi ban un ïoh ban leit ïashimbynta ha ka International Event kaba ngim pat ju poi pyrkhat mynno mynno ruh”, ong u bah Ambrose. Kumta ngi ngeit bad kyrmen skhem ba ka jingtrei shitom jong u kan sa wanrah ïa ka jingjop bad kan long ruh ka burom ïa ka distrik, ka Jylla hi baroh kawei bad ka jingkitbok kan leit ruh sha u Kevin John Khyllait u ban leit lang u ba dei a Mairang, Eastern West Khasi Hills District.
Kumta kum ka association lyngba u President sa shisien ka kitbok bad ka duwai ruh ba U Blei Un long ryngkat bad ki haduh ba kin da poi suk sha Ladakh bad ba ha ka jingïakhun jong ki ruh ba kin lait na ki jingmynsaw bad haduh kaba kut hi ba kin ïoh ban kheit ïa u soh ka jingjop.
Ha kane ka sngi, la ïoh ruh ka jingkren ai mynsiem na u samla A. Kharlyngdoh, Vice President ka Mawkyrwat District Cycling Association (MDCA), na bah G. Shylla, General Secretary ka Mawkyrwat District Cycling Association (MDCA) bad na u samla S. Khawdewsaw, Organizing Secretary ka Mawkyrwat District Cycling Association (MDCA) ha ryngkat ka jingïadonlang ki para nongkitkam bad ki dkhot jong ka association.