Shillong, Nailur 28 : Ka Seng HYC Shella Area Unit ka lah pynlong ka ka Prokram kitbok kitrwiang ïa ki 3 ngut ki khun samla ka Shnong Shella kiba lah shah jied ban mihkhmat ia ka Jylla Sha ka 36th National Games Aquatic Championship ha Gujarat ka ban long naduh ka 30 tarik September, 2022 haduh 10 tarik October 2022.
Kine ki samla ki ba dei na Shnong Shella ki ban leit ia shim bynta ha katei ka Lympung ki long U Banpynshngaiñ Syngwan, i Mary Jone Syngwan bad i Pdiangsuklang Syngwan. Ka Seng ha ka Prokram lyngkot kaba lah pynlong ha Shillong Club ka lah ai bai kitbok bai rneng mar 5000 tyngka marwei sha kine ki samla.
Ha ka jingïalang kaba lyngkot lah ïoh ki kyntien kyntu kynpham bad kitbok kitrwiang na u nongialam ka Seng u Samla Rangbah Roy Kupar Synrem, General Secretary, HYC Sengkmie, uba dei ruh u trai Shnong na Shella.
Ha ka jingkren lyngkot une u nongialam u lah ai khublei kyrpang ïa kine ki khun samla ka Shnong kiba lah shah jied ban leit mihkhmat ia ka Jylla. U sngew ban pynpaw ruh ka jingai khublei kyrpang ïa baroh ki samla bad ki nongpynïaid napoh Shnong Kiba lah kyntiew ïa kane ka jingïalehkai lyngba ka jinglah ban jop takma ha ka Meghalaya Games ka ba dang shu dep kumba 10 tylli bad kumjuh ruh kiba lah lah ban leit ïa shim bynta ha ki Lympung ïalehkai bapher bapher habar Jylla.
U la pynpaw ruh ïa ka jingsngew diaw ba watla kiba bun ki samla ki lah mih na ka dong ka thaiñ kiba don ka sap ka phong ha ka kam jngi hynrei kim lah pat ban pyntbit shuh shuh ïalade khnang ba kin lah ban jop takma ha National level namar ki jingduna ki jaka kilan met bad ki Coach kiba biang. Na Shella ki hap ban pynlut por lut pisa ban wan kilan met ha Shillong bad sha Guwahati ruh kumjuh tang ban ïoh pyntbit ïalade. U lah kyntu ïa ka Sorkar ba kan phai shakhmat sha ki Samla ka Shnong Shella kiba donsap bad ban pynbit pynbiang ïa ki jingdonkam jong ki kum ka Swimming Pool bad ki Coach kiba biang khnang ba kin lah ban wanrah nam burom ïa ka Jylla hi baroh kawei.
U lah kyntu ruh ba ka Sorkar ka dei ban pyntreikam hok ïa ki kyndon jong ka State Sports Policy khnang ba kan long ka jingmyntoi ïa ki khun samla jong ka Jylla hi baroh kawei.
Na ka liang une u nongïalam u lah kyntu ïa kine ki samla ba kin trei shitom ban wanrah ka nam ka burom ïa ka Jylla bad ïa ka Shnong Shella khamtam. U la kitbok ba kin poi suk sha ka jaka ïalehkai bad ba U Blei Un don ryngkat ha ka jingïaid lynti ka jong ki.
