Nongstoiñ, Lber, 24: Ka United Hynñiew Trep Movement West bad Eastern West Khasi Hills lyngba u President Samla M Nongrem, General Secretary Samla R.B Rekon Thabah bad Education Secretary Samla Chesterfield Deracle Nongrem, ka kitbok kit rwiang ïa ki khun samla ka Jaidbynriew kiba ïaleh ïa ka Exam jongka Class 10, 12 bad kiwei kiwei de ki exam ha ki Examination Board bapher bapher ba don ha ka Jylla mynta u snem 2022.
Ka seng ka kitbok ba kin trei shitom ban trei minot ha ki exam jong ki, ba kin ïoh ïa u soh ka jingjop bad wat hapdeng ka jingshah pynthud pynwit jong u Covid 19. Hynrei kumba ong ‘U Blei u long ryngkat, u ïarap bad kito ki briew kiba ïarap ïalade’, te ka seng ka kyrmen skhem lyngba ka jingtrei shitom ka jingtrei minot bad khlem kynran dien ka jong ki, kan wanrah ïa ka burom ïa ka ïing ka sem, ka kur ka jait, ka shnong ka thaw bad ïa ka Jaidbynriew hi baroh kawei.
Ka seng ka shem ba ka jaibynriew Khasi ka la hiar ar sut ha ka liang ka pule puthi, kham ñiar ruh ban shem ïa ki samla Khasi ba kin pass ïa ki kynja eksamin kiba kham heh kum ki Civil Services, IFS, IES bad kiwei kiwei. Haba peit pat ïa kiwei ki jaidbynriew, la ïohi ba ki la nang kiew shaphrang bad kane ka long ka jingma ïa ka jaibynriew.
Lada kan ïai long kumne satang lano ngin sa long kiba sahdien tam ha baroh ki liang napdeng ki jaidbynriew, namar katkum ka juk ka jingnang jingstad ka long ka atiar kaba radbah tam ban kyntiew ïa ka roi ka par bad pynkhlaiñ ïa ka jaidbynriew.
