SHILLONG, Nailur 28: Ka Lawsohtun United Social and Cultural Organisation ka la pynlong ïa ka jingïalang ban kitbok kitrwiang ïa ka kynhun ka ban sa aireng ha ka lympung phutbol kyrdan First Divion jong ka Shillong Sports Association.
La pynïaid ïa ka jingïalang da u bah Arki Mylliemngap General Secretary LUS&CO.
Ha kane ka sngi na ka liang jong ka Club ka la ïoh ruh ban pyllait ïa ki jersey na ka bynta ka kynhun phutbol, basketball bad kum juh ruh ïa ka kynhun criket, ïa kaba la pyllait paidbah da u Bah Hamlet Dohling, MLA barim jong ka Mylliem Constituency.
Na ka liang jong u Rangbah Shnong jong ka Lawsohtun, uba long ruh u President jong ka club u Bah Hartibert Rynjah, haba ai jingkren ula pyn paw ka jingsngewnguh ïa ka jingkyrshan bad jingïarap jong u bah Hamlet na ka bynta ki jingdonkam jong ka shnong bad kumjuh na ka bynta ka Sports Club.
Kiba la donryngkat lang ha kane ka sngi ki kynthup ruh ïa u Bah Manly Nonhpluh Finance Secretary KSU, ki nongïalam jong ka shnong bad ka Sports Club, NPP Lawsohtun Unit, KSU Lawsohtun Unit, ki nongshong shnong bad kumjuh ruh ki rangïalehkai jong ka kynhun football, basketball bad criket.
Haba ai jingkren, u Bah Hamlet u la pynpaw ba kumba u ju don ryngkat bad ka shnong hi baroh kawei un dang bteng ban don ryngkat bad ai ka jingkyrshan katba lah na ka bynta ka jingdonkam ka shnong, ka club bad ki nongshong shnong kumjuh.
U la ai khublei ruh bad kitbok kitrwiang ïa ka Lawsohtun Sports ba kan ïalehkai bha ha katei ka lympung ka ban sa long ha Polo.
