Shillong, Risaw 16 : Ha ka jingïalang kaba rit bad kaba ishongkun, Ka Kur Sten Dorbar Pyllun, Meghalaya mynta ka sngi 16.10.2024 ka la leit ban ai khublei Kitbok kitrwiang ïa ka Aiberis Sten, kawei na ki pyrsa Kur ha ka shnong Klew, Ri Bhoi District na ka bynta ka jingïohlad jong i ban leit mihkhmat ïa ka India sha ka Jingïalehkai ‘Asian Arm Wrestling International Cup’ ka ban long ha ka nongbah Mumbai naduh ka 19.10.24 haduh 27.10.24.
Ha jingkren u Bah HT Wells Sten, Adviser jong ka Kur Sten u la ai mynsiem da kaba maitphang ba ka Kur ka shait buh thong ban ai da ka Prof. HW Sten Excellence Award man la ka snem sha ki khun ki pyrsa jong ka Kur kiba pass bha ha ki Examination bapher bapher.
U la ong ruh ba wat ha ka liang jong ka Sports, ngi sngew sarong ba ka Kur ka la paw haduh National bad International level. Kumta u ai mynsiem bad pynshlur ïa ka Aiberis ba ka dei ban shaniah nyngkong eh ha u Blei bad ban kohnguh ïa ki jingpyniaid jong ki bor badei ban peit ïa i, namar kane ruh ka dei kawei na ki lad ban ïohkam ïohjam ynda la poi sha ki kliar lum jong ka Nam.
Ha ka jingkren jong u Dr. Batskhem Sten Vice President, u la kyntu ïa ka Aiberis ban long ka briew kaba adkar bad ban bud ryntih ïa ka discipline khnang ban poi sha ka thong namar ha ka sports khlem ka discipline la phi stad phi khlaiñ katno katno ruh kam myntoi lada phi buh sharud ïa ka discipline. U ong ruh ba ka Kur kan sa leh burom ynda haba katei ka pyrsa kan ïoh kheit ïa u soh jong ka jingjop.
Hashwa ïa katei ka jingïalang, la ïoh ban kren pdiang da u Bah Beril Sten u Kni jong ka Ïing ryngkat bad ki kyntien kynpham na u Bah August Sten, President jong ka Kur Sten RiBhoi Circle. La pyniaid ïa ka Jingïalang da u Bah Gilbert Sten, President Kur Sten Dorbar Pyllun uba pyrto ruh ïa ka jingkyrshan lang jong ki kmie ki kpa ïa katei ka pyrsa.
Ka Aiberis ka dei ka khun jong u Bah Hehbok Pyngrope bad i Kong Rosegina Sten.
Ka Aiberis ka la shah jied ban leit mihkhmat hadien ba ka la jop ïa ka jingïakhun hapdeng ki national players kaba long ha Shillong dang ha kine ki khyndiat bnai ha ka 50 Kgs Category. La ai jinghikai da u Bah Alan Sun Marbaniang na ka MLP kum u Coach jong ka.
Hadien ba ka Aiberis ka la ïoh ban mihkhmat borabor ïa ka RiBhoi District, ka la ïoh ruh ban mihkhmat ïa ka jylla Meghalaya ha kaba ka la jop ruh ïa ka Gold Medal ha katei ka category ba la kdew haneng ha ka 1.06.2024. Kumta ka Kur ka kyrmen skhem ba ka Aiberis kan wanrah ia ka jingjop ba don burom.
