Khliehriat Jymmang 03: Ka Khasi Students’ Union East Jaiñtia Hills District Unit, lyngba ka Sports Committee ka phah ïa u kyrwoh kittbok kitrwiang ïa baroh ki samla kiba na East Jaiñtia Hills District bad ruh ïa baroh ki samla khasi kiba leit ban ïashim bynta ha ki jingialeh kai sport bapher bapher ha ka Meghalaya Games 2022 kaba sdang naduh mynta ka ka 3 tarik u jymmang.
“Ha kum kane ka juk kaba mynta kaba long ka juk jong ka jingiakhun, ki samla ki donkam ym tang ban ioh kheit ïa u soh ka jingjop hynrei ban kiew ruh sha ki kliar lum jong ka jingjop. Shuh shuh ka juk ba mynta ka dawa shibun kiei kiei na ka bynta ka jingbha bad jingmyntoi ka imlang ka sahlang, kumta ka Sports Committee jong ka KSU-EJHDU ka kyntu ïa ki samla ialehkai ba ki dei ban trei borbah bad minot thop khnang ba kin wan sha khmat bad kiew irat ha ki jingialehkai ki jong ki kiba katkum ki sap ialehkai. Katba dang iaid ki sngi bad ki por ka jaibynriew Khasi ka la hiar arsut ha ka liang ka kam ialehkai Sports, kumta ban lait na ka jinghiar arsut ha ka kam ialehkai Sports, ki samla ki dei ban trei minot bad trei shitom bha namar ngi donkam shisha ïa ki samla ba kin wanrah ïa ka nam ka burom ïa ka District bad ïa ka jylla hi baroh kawei” ong u kyrwoh.
Ha kajuh ka por ka seng ka buh ïa ka jingkyntu ba ki dei ban don ruh ka mynsiem ialeh bad iaishah shitom ha ka jingialeh.
“Ka Jaitbynriew jong ngi, kaba biang ki samla kiba sap, ban pynlong ïa ka jaidbynriew kaba khlaiñ ban pynduna ïa ki kam sniew ban saiñdur ïa ka lawei kaba phyrnai. Kyntang iawai ka seng ka buh ruh ha ki jingduwai ba kyrpang ïa baroh kito ki samla kiba iakhun ïa kane ka Meghalaya Games ha ki kam sport bapher bapher bad ai mynsiem ruh ïa phi baroh ban phin wanrah ïa ka lawei ka ba shngaiñ” pynkut u kyrwoh na u Sport Secretary jong ka KSU East Jaiñtia Hills District, u samla Shwari Ryngkhlem.
