Kitbok bad ai khublei ka DS Mawpait-Tlongpleng ïa ki samla BSW ka St. Edmunds’ College, Shillong

Mawkyrwat, Jylliew 06: Ka Dorbar Shnong Mawpait Tlongpleng ka pynpaw ka jingsngewnguh bad ai khublei ïa ki samla pule Bachelor of Social Work (6th semester) jong ka St. Edmunds’ College, Shillong kiba la pyndep ïa ka Field Work ka jong ki hapoh ka shnong Mawpait Tlongpleng ha ka 28 tarik u bnai Jylliew, 2022.
Kum ban shu pynkynmaw kine ki samla pule baroh 6 ngut ka Janis Ann Dkhar, ka Angelista Syiemlieh, ka Daphilakmen Lyngdoh, ka Aijingkmenlang Nongneng Shanpru, ka Bakhamkorshisha Nongsiej bad u Samla Richard Sanglyne hapoh ka jingpeit ka madam Aibakor Kharbuli kum ka Supervision bad ïa kane ka field work ki la sdang naduh ka 18 tarik u Lber, 2022 bad ki la ïoh ban pyndep ha ka 28 tarik u Jylliew, 2022.
Ha kitei ki bnai, kitei ki samla pule ki la pyndep ïa bun ki kam (activities) kum: ka jingïalang bad ki paidbah jong ka shnong, ki la pynlong ïa ka PRA tools, ka jingleit jngoh ïa ki skul, ICDS Center, ïa ki ïing briew, ka jingïamir jingmut bad ki ASHA, ki SHGs, ka jinghikai ïa ki khynnah skul ïa ki kam ba ki dei ban leh bad ki bym dei ban leh kum ki khynnah skul, ka prokram jingpynkhuid ïa ki rud ki kiar bad jingsam ïa ki jingbuh ïa ki jakhlia (dusbin) ryngkat bad ki SHGs, ki jinghikai ïa ka hok jong ki khynnah, ka prokram halor ka HIV & AIDS ryngkat ka jingïatreilang bad ka MACS bad kumjuh ruh ka lympung ïalehkai ba shi sngi.
Kitei ki program baroh ba la pyndep da kitei ki samla pule ki long kiba sngewtynnad bad kiba ai jingmyntoi na bynta ki nongshong shnong khamtam lyngba ki awareness program.
Namarkata, ka Dorbar Shnong ka phah ruh ka jingkitbok ïa baroh 6 ngut ki samla pule ba kin leh bha ha ki egsam ka jong ki, khnang ba kin ïoh ban kheit ïa soh ka jingjop. Kane ka long katkum ka kyrwoh ba la pyllait da u Secretary Shnong, bah Marius Nongsiej.