Kim ju pynmih sur haba dang don hapoh ka Party, kynthah kylla sa u Bah Pala ïa ki MLA phet seng

Shillong, Nailar 22 : U President ka Meghalaya Pradesh Congress Committee (MPCC) u Bah Vincent H Pala u la ong ba ym ju don mano mano ruh kiba pynsawa ne pynmih sur pyrshah ïa ka jinglong nongïalam jong u ha ka por ba ki dang don ha ka party hynrei ynda ki la poi sha kawei pat ka party ki sdang ban pynmih ïa ki jingkren ba harukom.
“Ki la dei ban kynnoh (ïa ka jinglong nongïalam jong nga) ha ka por ba ki dang don ha ka party. Nga dei tang u president ba la shu thung kumto”, la ong u Bah Pala haba kren bad ki lad pathai khubor hadien kajingïalang jong ka Congress ha Congress Bhavan hakane ka sngi Palei.
Une u President ka Congress u la ïathuh ruh ba hadien ba u la mad ïa ka jingshah rem ha ka elekshon MLA ha u snem 2023 u la leit sha Delhi bad pynsngew ha ki nongïalam ka AICC ba un iehnoh ïa ka kam nongïalam. Nalorkata, u ong ruh ba ïa kane kajuh ka sienjam u la shim hadien ba u la shah rem ha ka elekshon MP ba u long uba kloi ban ieh noh ïa ka kam nongïalam hynrei la ong ba ha baroh ar sien kynthih, la bthah ïa u ba un bat shwa ïa ka kam nongïalam ha ka party.
Shuh shuh u ong ruh ba lada don ba kylli ïa ki MLA ba mih na ka Congress yn ym don uwei ruh na ki ban ong ba ki mih na ka party namar ba kim sngewtynnad ïa u President.
“Haba ki don hapoh ka party kam ju don satia ka jingïakren ba nga dei ban hiar shuki. Hadien ba ki la poi sha kawei ka party pat la don ba bthah ïa ki ba kin kren ïa kane, kren ïa kata,” la bynrap biang u Bah Pala.
Nalorkata, u la ong ruh ba don bun kiba la mih na ka party kiba wan khroh mynta ba ki kwah ban wanphai biang sha ka Congress da kaba ong ba ym don shuh kum kane ka party kaba sngewthuh.
Ym tang katta, u la kob ruh ba ha ka elekshon 2028 bun kin sa wan biang ban pan tiket ban ïakhun na ka Congress.
“Ki nongïalam ba ha khlieh jong ka party mynta ki la sngewthuh ba dei tang ka Congress ka party kaba lah ban wanrah ïa ka hok bad ban ïarap ïa ki paidbah, khamtam ïa ki riewlum bad ki rit paid.”
U president ka MPCC u la ïathuh ruh ba kitei ki lai ngut ki MLA ka party ki phet noh na ka Congress dei tang na ka daw ka elekshon shiteng samoi ha Gambegre. Katkum ka jingong jong u, ka NPP ka sngewthuh ba ka don ka jingkhie rasong jong ka Congress ha Rilum Garo ba watla ki don tang uwei u MLA ruh ki la lah ban jop pat haduh 22 tylli ki constituency ba mihkhmat da ki MLA na kiwei ki paty ha kane ka elekshon MP ba dang shu lah shen na Tura Parliamentary constituency.
“Kumta ki la pyrkhat ba lada ka Congress ka leh bha ha Garo Hills kumta ruh kan leh bha Rilum Khasi-Jaintia. Ki pyrkhat tang kawei ka lad ka long ba kim lah ban leh ei ei ïa u President kumta ki la lap ïa ki thong kiba jem,” u la ong.