Kilan met ki samla thepkam shipai Indian Army hakhmat u mot Kiang Nangbah

Shillong, Jylliew, 24: Da ki phew ngut ki samla shynrang ka Jylla Meghalaya kiba aplai ïa ka kam shipai Indian Army ba la pynlong ha u snem 2021 bad kiba la pyndep ïa ka jingïamareh, ka jingpeit bniah ïa ka Koit ka Khiah bad kiba ap sa tang ban thoh ïa ka Common Entrance Examination (CEE) ha ka sngi Thohdieng ki la mih paidbah ban pynpaw ïa ka jingpyrshah ba ka Sorkar Pdeng ka la pynduh noh ïa kane ka eksamin.
Katkum ka jingïathuh jong kine ki samla, ha Meghalaya, kiba la dei ban thoh ïa ka eksamin ki don kumba 700 ngut hynrei haduh mynta ki sah hapdeng ka umdum namarba ym shym la pynlong shuh ïa kane ka eksamin. Dei halor kane ka nongrim ba ki la pynpaw ba kim pyrshah ïa ka jingpynbna jong ka Sorkar ïa ka skhim Agneepath hynrei ka jingdawa jong ki ka long ban pynlong ïa ka eksamin CEE khnang ba kin ïoh rung kam ha ka tnat shipai Indian Army.
Ha kaba ïadei bad kane, kine ki samla ki la pynlong da ka jingïakhih hakhmat u durmot jong u Kiang Nangbah bad pynpaw ïa ki jingsngewsih lyngba ki jingthoh plakad kiba pynpaw ïa ka jingdawa ban pynlong noh ïa ka Common Entrance Examination kaba la pynsangeh mynta la jan shi snem kynthih.
Ha ka jingïakren bad u Mawphor, kine ki samla ki la pynpaw ba kim don eiei ban kynthoh halor ka jingmynjur jong ka Kynhun Myntri ka Sorkar Pdeng ïa ka skhim Agneepath, hynrei ki la dawa ba Sorkar Pdeng ka dei ban sngewthuh ïa ka jingangnud jong kine ki samla da kaba pyndep shuwa ïa ka Common Entrance Examination kaba ki samla ha kylleng ka Ri India ki la ap khmihlynti baroh shi katta.
Da ka jingai jingbit jong ka Deputy Commissioner ka East Khasi Hills District, kine ki samla ki la pynlong ruh da ka jingïaid paidbah nakhmat u durmot jong u Kiang Nagbah sha Malki bad hadien kane ki la wan phai biang hakhmat une u durmot ban pynlong ïa ka jingïakhih ba jaijai jong ki.