Kiewdor ka Challan khaii maw naduh ba la ai jingbit ka SDO Pynursla ban ai Quarry Slip

Shillong, Jylliew, 17: U President jong ka Bri Hynñiewtrep Exporter and Importer Association (BHE&IA) u Bah Nikistar Nongrang u la ong ba ka jingai jingbit jong ka Sub Divisional Officer (SDO) jong ka Pynursla Civil Sub Division ban pyntreikam ïa ka Quarry Slip ka dor jong ka Challan ban khaii maw ka la kiew syndet na ka T.2200 hajar sha ka T.4000 hajan na ka bynta san ton.
Ha ka jingïakren bad ki lad pathai khubor ha ka sngi Saitjaiñ ha Shillong Press Club, u Bah Nikistar u la ïathuh ba ka SDO ka la pynmih ïa ka jingai jingbit naduh ka 29 tarik Jymmang 2023 bad mar ïa mih kane ka hukum ka dor jong ka Challan khaii maw ruh ka la kiew syndet
Kum ka seng ki nongkhaii ka la ïa kynduh ïa ka SDO ha ka 10 tarik mynta u bnai ban pynpaw ïa ka jingsngewkhia halor ka jingbym ïoh ïa ka Quarry Slip ban thied maw bad ban khaii ïa u maw sha ka ri Bangladesh kumba long lem kiwei pat ki para nongkhaii maw jong kiwei kiwei ki Seng.
“Ngim pyrshah ïa kata ka jingai Quarry Slip hynrei kaba ngi pyrshah ka long ba ïa ka Quarry Slip la shu ai tang sha kiba mon da ki nongpynïaid kiba bat ïa ka Quarry Slip,” u la ong.
“Ka jingai ïa ki Qaurry Slip tang sha ki kiba mon, ka pynpaw ba don kiba ïoh ban kit maw manla ka sngi sha Bangladesh, katba don kiba ïoh tang ar ne lai sien ha ka shibnai. Ka jingkwah jong ngi ka long ba dei ban ai lang solansar ïa baroh ïa ka Quarry Slip khnang ba ka jingkamai jakpoh kan long ïa baroh,” u la bynrap.
Ha ka jingshisha ban shalan ïa u maw sha Bangladesh ka donkam tang ïa ka Challan ba la ai na ka ophis jong ka DMR bad ka Letter of Credit (LC) kaba la ïa da u Importer na ka ri Bangladesh hynrei hapdeng kata la mih bun ki Slip, kum ka COVID Slip, Parking Slip bad mynta la mih sa ka Quarry Slip kaba ki nongshalan maw kim lah shuh ban sngewthuh.