Nongstoiñ, Jylliew, 30: U Joint Secretary ka Sorkar India u Rakesh Gupta IAS, u la pyntip ba ki jingsniew lyngba ki Social Media ka la kiew sted haduh katta katta, ha kaba ka Sorkar Kmie ka la kyntu ïa ka Sorkar Jylla ban ai ka jingpynshai paidbah, khnang ban lait na ki jingshah pynbiej bad ki jingsniew, kaba mih na ka jingpyndonkam bakla ïa ka social media, khamtam ki jingsniew ha kaba ïadei bad ki kynthei bad khynnah.
Ban the lakam ïa kane ka jingsniew ka Sorkar India ka la wanrah da ka Indian Cyber Crime Coordination Centre (14C) scheme bad lyngba ka National Cyber Crime Reporting Portal www.cybercrime.gov.in. Ka National Toll-Free Helpline Number 1930 bad ki paidbah ki lah ban ujor bad la pynkup bor ha ki pulit, ban kem bad pynshitom ïa ki nongleh kam sniew. Kumta la kyntu ïa ki paidbah ban long kiba husiar, ban nym shah pynbiej ha ki kam thok kam shukor lyngba ka Social Media, ba la tip kum ka Cyber Crime.
Kine ki jingjia ki la pynsngewkhia bha ia kiba bun ki kmie ki kpa na ka daw ka jingpyndonkam jong ki khynnah skul ia ka Social Media kaba ktah bha ia ka jingmut jingpyrkhat ka jong ki bad kaba ktah ruh wat ia ka met ka phad bad ka bor jabieng.
Ym tang katta ka jingpyndonkam jong ki khynnah ia ka Social Media ka la ktah ruh wat ia ka pule ka puthi kaba long ka lawei na ka bynta jong ki.
Ym tang ki khynnah hynrei ka Social Media ka la ktah bha ia ka imlang ka sahlang khamtam haba kiba la heh la san ki pyndonkam ia ka social media kat haduh ba ki la don ki khep ba ka wanrah ka jingiasngewsih ha ka ing ka sem.
