Shillong, Jymmang 13: Ka Nongthymmai SC kala kiew sha ka kyrdan ïalehkai Shillong Premier League (SPL) ha ka samoi ban wan hadien ba kala jop da kaba pynliem da 4-0 pyrshah ïa ka Umphyrnai SC ha ka jingïakhun kaba khatduh ka jong ka ha ka First Division ha ka sngi Thohdieng.
Ha kane ka jingïakhun kaba la pynlong ha madan Third Ground, Polo, Shillong baroh arliang kila ïakhun tyngeh hynrei kila pynlehnoh ei ïa kiba bun ki kabu thep kol. Katba dang ïaid ki minit ka jingïalehkai kala nang ïathnem bha ha baroh arliang, hynrei dei tad hashwa ban kut ka kylla step ka Nongthymmai kala ïoh ban pynkhih jar kaba dei ha ka minit 45+1 lyngba u Bonafide Kurbah, kumta ka Nongthymmai SC kala ïoh ban lamkhmat da 1-0.
Haba wanphai sha ka kylla miet, ki rangïalehkai ka Nongthymmai SC kila nang ïakhun tyngeh khlem ailad satia, bad da kane ka rukom ïalehkai kala ïoh biang ban pynkhih jar kaba la wan lyngba u Mat Makri ha ka minit ba 51 bad tand katto katne minit u Verjelous Shylla u la thep ïa ka kol kaba lai ha ka minit ba 57 kaba la pynskhem ïa ka kynhun ban nang teh lakam shuh shuh ïa ka jingïalehkai.
Ki rangïalehkai ka Umphyrnai kila pyrshang ban thep kol hynrei na ka daw ka jingbym lah ban pyndep ha ka liang ka thep kol kila hap ban mad ka nam rem ha kaba ka Nongthymmai SC kala ïoh biang ban thep kol lyngba u Ïohbor Nonglyer ha ka minit ba 74.
Lyngba kane ka nam jop ka Nongthymmai SC ka kamai 15 point bad tam da ar point ïa ka Nongrim Hills SC bad lai point ïa ka Sawmer kaban sa ïalehkai khatduh mynta ka sngi Saitjaiñ.
Ka Umphyrnai SC ka kamai 7 point bad sah satang shisien ïalehkai pyrshah ïa ka Imson SC kaba kamai tang shi point. Ka jingïalehkai mynta ka sngi Saitjaiñ kan long hapdeng ka Sawmer SC pyrshah ïa ka Lawsohtun SC ha ka por 3:30 baje janmiet.
Ka Sawmer SC kan hap ban ïakhun tyngeh ban pynthikna ïalade ban rung sha ka Shillong Premier League ha ryngkat ka Nongthymmai SC.
