Kiew kyrdan ba saw ka Nangkiew Irat hadien ba pynliem ïa ka Ryntih da 6 kol ha ka OC Blue SPL 

Shillong, Lber 03: Ka Nangkiew Irat SC ka la kiew na ka kyrdan ba hynriew sha ka kyrdan ba saw ha ka miej kamai point jong ka OC Blue Shillong Premier League 2024 hadien ba ka la pynjemkhnap ïa ka Ryntih FC da 6-0 ha ka jingïalehkai kaba la long hynne ka sngi Nyngkong ha madan First Ground – SSA Stadium, Polo.

Ka la bam slem na bynta ka kol kaba nyngkong ba kan urlong, hynrei tang mar ïa pynkhihjar u Damehun Syih (58′) ki kol ki la bud kawei hadien kawei, ha kaba u Shaibor Nongrum (60’, 63’) u la ïoh ban thep ar tylli ki kol hapoh lai minit, kiwei pat ki kol la thep da u Wanpynshngain Nongsteng (66’), Khangmiki Pale (78’) bad u Wallamsuk Nongkhlaw (82’).

Kane ka resol kamut ba ka Nangkiew Irat mynta ka la kamai 25 point naki 17 sien ïalehkai, bad ka dang sah sa kawei ka jingïalehkai ban ïakhun. Kane ka la pynlong ïa ka Langsning FC, kaba la pyndep baroh ki jingïalehkai bad kaba kamai 24 point, ban hiar sha ka kyrdan ba san bad ka Laitkor SC, kaba la kamai 23 point bad kaba dang sah sa ar tylli ki jingïalehkai, ban hiar sha ka kyrdan ba hynriew ha ka miej.

La pynlong ïa ka jingsngap jar kaba shi minit shuwa ban sdang ka jingïalehkai kum ka jingkynmaw burom ïa u Bah SS Rapthap, Vice-President jong ka Shillong Sports Association, uba la khlad noh ha ka janmiet jong ka sngi Saitjaiñ. Ka jingleit ontep ïa u kan long mynta ka sngi ba Ar bad ka SSA ka la rai ban pynkynriah noh ïa ka jingïalehkai kaba la buh sha kawei pat ka tarik.

Ka jingïakhun kaban wan ha ka OC Blue SPL 2024 kan long ha ka sngi Balang hapdeng ka Shillong Lajong FC pyrshah ïa ka Rangdajied United FC ha ka por 03 baje janmiet. Ka Lajong ka la jop ïa ka jingïakhun 1st Leg da 2-1 ha ka 24 tarik Risaw.