Kiew kynsan ka jingpynrung Aadhar sha ka 78.21 % ha Jylla hadien ba byrngem pynduh skhim ka Sorkar Pdeng

Shillong, Jylliew 14 : Ka “50 days Aadhar Saturation Programme” jong ka Tnad Social Welfare ka Jylla ka la seisoh bha ha kaba tang hapoh shibnai, ka jingpynrung kyrteng Aadhar ka la kiew na ka 13% shuwa ban sdang ka jingpynrung kyrteng sha ka 78.21 % kat haduh ka 14 tarik Jylliew, 2023.
Kane ka jingpynrung kyrteng Aadhar ka la kiew sted ha Jylla hadien ba ka Sorkar Jylla ka la pynbna ba ka Sorkar Pdeng kala rai ban pynduh noh ïa ki skhim bapher bapher kynthup ïa ka jingsam marbam, Supplementary Nutrition Programme ba la mang sha ki Longkmie ba dang ai buiñ khun bad ki Khynnah ba hapoh ka 6 snem.
Ka Tnad Social Welfare ka la pyntreikam ïa ka Aadhar Saturation Campaign ban pynrung kyrteng ïa baroh ki nongshong shnong bad pynïasoh ïa ki kyrteng jong ki sha ki lad jingmyntoi baroh, ïa ki ban sa paw ha ka POSHAN Tracker bad kin sa ïoh ïa ki Supplementary Nutrition na ki Anganwadi Centre.
ïa kane ka Campaign la pyntreikam hadien ba ka Ministry of Women and Child Development kala pynbna ban pynduh noh ïa ka Supplementary Nutrition Programme ba la ai sha ki 10% namar ka jingduna palat kiba don kyrteng Aadhar napdeng ki Longkmie ba armet, kiba ai buiñ khun bad ki Khynnah kiba hapdeng 0-6 snem ka rta ha Jylla.
Ka Ri-Lum Garo kala kiew bha ha ka jingpynrung kyrteng watla ki paidbah ki la mad ïa shibun ki jingeh ban leit ïeng laiñ namar ka jingshit kyrang ka bneng bad ka jingpynlip bording.
Lai tylli ki District ka Ri-lum Garo ki la kynjoh ïa ka 95% ha ka jingpynrung kyrteng Aadhar bad artylli ki la kot ïa ka 90%. Ka Ri-lum Jaiñtia bad ka Ri-Bhoi ruh kila kiew bha ha ka jingpynrung kyrteng.
Ka Ri-lum Khasi ruh kala sdang kiew hynrei kam pat kot satia kumba long kiwei khamtam lei ka South West Khasi Hills bad ka West Khasi Hills. Ka jingpynrung kyrteng Aadhar ïa kiba ïoh skhim ICDS kala kot sha ka 78.21% napdeng ki 4.45 lak ngut ki nongïoh jingmyntoi.
Ki Deputy Commissioner jong baroh ki District kila pyntreikam ïa ki buit treikam bapher bapher ban pynshlur ïa ki paidbah ba kin pynrung kyrteng Aadhar noh nalor ban ai mynsiem ruh ïa ki Nongtrei ba kin trei shitrhem.
Haba ithuh ïa kane ka jingtrei shitom, ka Tnad Social Welfare ka la ai ka jingkhublei sha baroh ki Deputy Commissioner bad ki Ophisar ka Tnad, ki DOP ka ICDS, CDPO, ki Anganwadi Workers bad ki Nongïalam kiba la trei borbah ha kane ka campaign.