Shillong, Jylliew 16 : Sa shisien pat ka jylla khamtam eh ka East Khasi Hills District ka la sakhi ïa ka jingkiew kynsan biang kiba ïabit thymmai ïa ka khlam COVID, hadien bun bun bnai ba la sdang ban kynjah jar.
Katkum ka jingpyntip na ka tnad ka Koit ka Khiah jong ka sorkar jylla, ha kane ka sngi Palei ki la don haduh 31 ngut kiba ïabit thymmai bad na kine haduh 23 ngut ki dei na East Khasi Hills, saw ngut na Ri Bhoi, 03 ngut na South West Khasi Hills bad iwei na West Khasi Hills kaba pynlong ïa ka jylla mynta ban don 42 ngut kiba ïabit ïa katei ka jingpang.
Haba phai sha ka East Khasi Hills, na kitei ki 23 ngut kiba ïabit thymmai, haduh 22 ngut ki dei kiba lap na kaba test bad iwei pat iba dang shu wanphai na shabar. Na Ri Bhoi bad kumjuh na South West Khasi bad ruh na West Khasi Hills kine baroh ki dei kiba lap na kaba test.
Ka kyrwoh na ka sorkar ka ong ruh ba bun na kitei kiba ïabit thymmei ki dei ki khynnah skul kiba leit ban test ïalade namar ki hap ban shim bynta ha ka lympung NEHU Athletic. La ong ruh ba kiba bun hi kidei ki bym don dak jingshitom ei ei bad ki don ruh ha ka met kaba koit kaba khiah bad mynta ki dang set slung ha la iing.
Kumta, na ka liang ka sorkar ka kyntu ïa ki paidbah ba kidei ban kynmaw ba ka khlam COVID kam pat kut satia bad ba donkam ban pyntikna ban pyndep ïa ka jingai tika kynthup ïa ki khynnah kiba la dap 12 snem shajrong. “Ka jingai tika ka ïada na ka jingshitom jur, na ka jingshah sumar hospital bad wat na ka jingïap ruh,” ong ka kyrwoh.
Kawei pat ka jingkyrpad na ka sorkar kadei ïa ki to kiba la noh ka rta ba kin shim ïa ki lad jingïada bad kumjuh ïa kiba hapoh 18 snem ka rta ba ki dei ban shim ïa ka tika ban ïada ïalade bad ruh ïa kiba haiing hasem.
La bthah ruh ïa ki paidbah ba ki dei ban bud pyrkhing ïa ki kyndon ban ïada na katei ka khlam kata naduh kaba deng ïa ki mask kat ha ki jaka ba ki leit khamtam eh ha ki jaka ba bun briew.
La ong ruh ba ka jylla ka la pynlong ruh ïa ka Genomic Survelliance ha Pasteur Institute man ka khep ban lap ïoh don kino kino kiba ïabit thymmai.
Kane ka long katkum ka kyrwoh ba la phah da i Kong RM Kurbah, IAS, Secretary jong ka tnad ka Koit ka Khiah ka sorkar jylla.
