Shillong, Nailur 26: Ka Sawmer ka la khur ïa ka jingjop kaba kongsan da kaba pynliem noh ïa ka Mylliem da 3-0 kol ban khur pura ïa ki lai point ha kawei na ki jingïakhun jong ka lympung Shillong Premier League 2025, kaba la long ha madan First Ground-SSA Stadium, Polo, hynne ka sngi Thohdieng.
U Michaelson Kurbah (38′, 54′) bad u Khainkupar Iawphniaw (77′) ki la pynkhihjar na ka bynta ka Sawmer. Da kane ka jingjop ka Sawmer ka la ïoh ban kamai 9 point, bad ka kiew na ka kyrdan ba 8 sha ka kyrdan ba saw ha ka miej. Katba ka Mylliem, ka dang sah ha ka thup kyrdan shah sloit (relegation zone), ha ka kyrdan ba 9 da tang 5 point.
Ka jingïalehkai ka la long kaba jaijai ha kaba sdang namar ba baroh arliang ki la pyrshang ban bishar bñiah shuwa ïa ki jingduna jong kawei pat katba kim pat kwah ban shim ïa ka jingma ban shah thep kol ha kane ka jingïakhun.
U Alem Khongwir jong ka Mylliem u la ïoh ïa ka kabu ha ka minit kaba 9, hynrei ka jingpyrshang jong u kam shym la ïaid kumba u la thmu. Nangta, sha kawei pat ka liang jong ka madan, u Khrawkupar Tamu jong ka Sawmer, u la pynsepei ïa ka kabu ban pynkhihjar hadien ba ka jingpyrshang jong u ban pynkhihjar da ka khlieh ka la lait sharud.
Shuwa ban ïoh pynkhihjar, u Michaelson u la lait sharud ïa ka jingpyrshang ha ka minit kaba 37 hynrei tang hadien shi minit u la pynthikna ba un nym duh ïa ka kabu da kaba thep suk ïa ka bol ba la pashat da u Bickyson Kharkongor.
Ha ka kylla miet u la ïoh ban pynbud ïa ka kol kaba ar jong u hadien ba u la ïohpdiang ïa ka bol pashat kaba janai na u Banman Roy Nongsiej. U Khainkupar, uba la pynshisha shisha ba u long u rangïalehkai ba kongsan ha kane ka samoi, u la pynkhih ïa ka bol kaba lai jong ka Sawmer kaba la weng noh ïa ka jingartatien ba ka kynhun kan khur ïa ka jingjop. Kane ka dei ka kol kaba saw jong u ha kane ka samoi, kaba la kyntiew ïa u ha ka kyrdan kaba lai ha ka jingïakhun ban ïoh ïa ka khusnam Top Scorer hadien jong u Himanshu Patil ka Nangkiew Irat bad u Loving Suting ka Mawlai, kiba baroh arngut ki la thep mar san kol.
Lah ban ong ba ki nongkyrshan jong ka Mylliem ki dei ban sngew lyngngoh ïa kaei kaba la jia ïa ka klob. Na ka jingsdang kaba bha ïa ka samoi, mynta ki la jah lynti khyndiat; kane ka dei ka jingshah rem kaba arsien lynter bad mynta ki la ïaid palat 225 minit khlem da thep kol. Na ka bynta ka Sawmer, kane ka dei ka jingjop kaba ar sien lynter bad ka sien kaba ar ba kan pynkut ïa ka jingïalehkai khlem da shah thep (clean sheet) – ha kane ka kynti hapoh ka jingïada jong u nongap kol ba thymmai u Jeffrey G Jyrwa.
Namar ha kane ka sngi Saitjaiñ yn aiti ban pynlong ïa ka jingïakhun final jong ka SSA Second Division 2025, kumta kan ym don jingïakhun ha ka SPL 2025 tad haduh ka sngi Nyngkong ha kaba ka Malki kan aireng pyrshah ïa ka Nangkiew Irat ha ka por 4:30 janmiet.
