Kiew ka jingtheh pisa ka sorkar ha ka pule puthi na ka `2045 klur sha ka `3654 klur tyngka

Shillong, Rymphang 16 : U Lat ka jylla u CH Vijayashankar haba kren plie ïa ka Dorbar Mang Tyngka jongka jylla mynta ka Lah Sngi U Blei u la ïathuh ba ka sorkar ka la theh pisa bun bha ha ka liang ka pule puthi namar ka la don ka jingkiew ba bun shah. Haba ïanujor ha u snem 2018 ka jingtheh pisa ha liang ka pule puthi ka long 2045 klur tyngka bad kat haduh mynta pat ka la kot sha ka 3654 klur tyngka. U la ong ba kane ka paw shai ba ka sorkar ka shim khia ban kyntiew ïa ka pule puthi hapoh ka jylla.
U Lat u la ong ba ka Flagship Programme Mission Education ka la wanrah ka jingkylla kaba khraw ïa kumba 2000 tylli ki skul da kaba la ïoh ban pynbha bad pynitynnad ïa ki kamra klass, ban kyntiew kyrdan ïa ki klass, ban pynbiang da ki tiar kat kum kane ka juk ba mynta bad tang halor kane ka sorkar ka la pynlut haduh 360 klur tyngka.
Ka jingpyntreikam ïa kane ka pisa ruh ka biang bha namar kumba 97% ki skul ki la dep lut ban pynbha nadong shadong haduh ka wat kaba lai bad mynta kin sdang sa ka wat kaba saw bad kane ka long pat ban pynbiang lut ïa ki jaka shong, ki jaka ïalehkai bad ter ter.
U la ïaroh ruh halor ka jngkiew ka pule puthi da kaba ki khynnah ki pass bha ha ka Secondary Leaving Certificate Examination 2-25 haduh 96 .08 % bad ka don ka jingkiew kaba haduh 40.27 % ïa u snem ba la dep. Ha ka Higher Secondary School Leaving Certificate ki khynnah ki pass bha haduh 82.8%. Nalor kata ban pynriewspah ïa ki kyntien tynrai la pynrung ruh ïa ka ktien Khasi bad Garo ha ka syllabus ba thymmai jongka jylla.
Lada phai sha ki kyrdan ba shalor ruh la iohi ba ka sorkar ka la nang kyntiew ïa ka pule puthi ha ka jylla da kaba wanrah ïa ka Captain Williamson Sangma State University kaba la sdang naduh u snem 2025.
Ka Shillong Government College of Engneering ruh ka la treikam bha. Ka College of Architecture and Urban Planning kaba ha Tura ruh ka la jan dep.
Ka jylla ka la tei ruh ïa 38 ki Eklava Model Residential School ban kyntiew ïa ka pule dangle jong ki trai ri trai muluk. Na kine ki skul ar tylli ki la treikam mynta. La seng ruh ïa ka Meghalaya Teacher Training Academy ban ai jingpyntbit shuh shuh ïa ki nonghikai.