Shillong, Risaw 07: Watla ka jingshlei jong ka um ha thain Garo Hills ka la hiar mynta na ka daw jong ka jingsangeh jong u lapbah, hynrei ka jingïap ki briew ha Ri-lum Garo na ka jingther u slap ka la nang kiew biang bad ka la poi mynta sha ka 17 ngut hadien ka jingngam jyllop sa 2 ngut ki khynnah ha North Garo Hills.
Kine ki khynnah kiba ïap ki dei kiba la ithuh da i Silarin R Marak ba 8 snem bad i Tangme R Marak ba 3 snem. La ïathuh ba kine ki khynnah ki la hab hapoh ka thliew septic tank kaba shlei da ka umslap ha ka shnong Bate Apal-Bangsi Apal. Kane ka jingjia ka la jia ha ka sngi Saitjaiñ.
Ka khubor ba la ïohlum la ïathuh ba kine ki khynnah ki dang ïamuja ïalehkai harud ïing bad kila syntuid sha kane ka thliew kaba la tih ban shna paiñkhana ne septic tank.
La ong ba ka jingther jong u slap ym tang ba ka la pynshlei um ïa ka thliew hynrei ka la pynjynjar ruh ban ïohi ïa ka, kaba la pynlong ïa kine ki khynnah ban hab shapoh jong kane ka septic tank.
Ka khubor ka ïathuh ba da kane ka jingjia, ka jingïap briew ka la jia ha ki 4 na ki 5 tylli ki District ka Ri-lum Garo ba kynthup ïa 3 ngut ha East Garo Hills, 5 ngut ha West Garo Hills, 7 ngut ha South Garo Hills bad mynta sa 2 ngut ha North Garo Hills, kaba pynlong baroh haduh 17 ngut kiba ïap na kane ka jingjia kaba sngewsih. La ong ruh ba na kine ki 17 ngut, 12 ngut ki dei kiba la khlad na ka daw jong ka jingtwa ha khyndew, 2 ngut dei kiba la ngam jyllop bad iwei dei na ka jingjia hab u dieng.
