Kiew ka jingdon kiba aplai EPIC ha Garo Hills lyngba ki kam thok kam shukor, kynnoh ka ACHIK

Shillong, Naitung 13: Ka A’chik Conscious Holistically Integrated Krima (ACHIK) ka la pyntip ba ka la don ka jingkiew bha ka jingaplai ïa ki voter ID card lyngba ki kam thok ha ka thaiñ Garo Hills.
Ka ACHIK ha ka shithi ba ka la phah sha u Chief Electoral Officer u BDR Tiwari ka la ïathuh ba kane ka jingkiew bha ka jingshim ïa ki application ka la jia kyrpang ha ki shnong kum ka Rajabala, Bhaitbari, Phulbari, bad Tikrlkilla.
“Ki la don shibun ngut kiba aplai EPIC kiba thymmai ba la kynnoh ba ki la ïoh ïa ki EPIC lyngba ki kam kiba beaiñ, kaba kynthup ïa ka jingaiti ïa ki kot ki sla kiba thok kum ki residential certificate bad ki No objection Certificate (NOCs). Kine ki kam kiba don ki jingsuba sniew ki wanrah ki jingsngewkhia halor ka jinglong hok ki kam elekshon ha kine ki thaiñ,” kynnoh u General Secretary ka ACHIK (Fields & Operations) u Adam R. Sangma.
Kane ka seng ka la kyntu ïa u CEO ban sdang noh ka jingpynshisha ïa baroh ki kot ki sla ba la aiti da ki nongpan EPIC kiba thymmai, khamtam kyrpang ha kitei ki thaiñ ba la kdew haneng. “Ban pynthikna ïa ka jingïaid beit ki kam ka aiñ halor ki kot ki sla, ym tang ba kan ïada ïa ka jinglong kyntang ki kam ka riti synshar paidbah hynrei kumjuh ruh kan ïarap ban ïada ïa ki jyrwit jyrwat kiba wanjia hadien habud ba ïadei bad ka jingpynrung kyrteng ki nongthep vote ba beaiñ bad ki jingithuh kiba thok,” pynpaw ka ACHIK.