Shillong, Lber, 31: Ka Seng saiñpyrthei National Peoples Party (NPP) ka la nang kiew ha ka jingbunpaid ha Khasi Hills Autonomous District Council (KHADC) da ka jingpynïasoh sa u MDC jong ka Seng Congress na Rambrai-Jyrngam Constituency u Bah Bajop Pyngrope ha ka sngi Palei.
Ha KHADC, ka NPP ka don mynta 12 ngut ki MDC ha ka Ingdorbar kaba 30 ngut ki dkhot. Dang shen ki MDC kiba la pynïasoh ïalade sha ka NPP ki long u Bah Lamphrang Blah, ka Kong Macdalyne Sawkmie Mawlong, ka Kong Grace Mary Kharpuri, u Bah Fantin Joseph Lakadong bad u Bah Teiborlang Pathaw.
Ïa u Bah Bajop Pyngrope la pdiang sngewbha ha ka jingïalang kaba la long ha ophis treikam jong ka Party ha nongbah Shillong.
U Bah Bajop Pyngrope haba kren ha kane ka jingïalang u la ong ba ka jingmih noh jong u na ka Seng Congress ka dei na ka daw ba la jur shaba palat ka jingïashrut hapoh kane ka seng.
Ha kane ka jingpdiang sngewbha ïa u Bah Bajop Pyngrope kum u dkhot bapura jong ka party bad ïa ki nongïalam kiba la mih noh na ka Seng Congress, la sakhi lang da u National President u Conrad Kongkal Sangma, u National Vice President u Bah Prestone Tynsong, ki MLA jong ka Party bad kiwei kiwei.
U Bah Prestone haba kren ha kane ka jingïalang pdiang sngewbha ïa u Bah Bajop Pyngrope kum u dkhot bapura jong ka Party u la pynbna lypa ba ka Seat jong ka Rambrai Constituency ha u snem 2023 ka ladei lypa ka jong ka NPP.
U National Vice President jong ka NPP u Conrad K. Sangma u la ong, ba ka jingwan pynïasoh jong u Bah Bajop Pyngrope kan nang pynkhlaiñ shuh shuh ïa ka Party ha West Khasi Hills District.
“Ngi donkam ïa ki nongïalam kiba dang samla ki ban sa long ki nongïalam hapoh ka jylla ha ki snem ki ban sa wan,” ong u Conrad.
