Nongstoiñ, Lber, 27: Ha kine ki sngi ka petrol bad diesel ka la sdang ban kiew dor biang khyndiat pa khyndiat bad haduh ka sngi saitjaiñ, ka dor jong ka petrol ka long Rs 97.66 bad imat ha kane ka taiew ban wan ka lah ban kiew sha ka shispah tyngka tam shi litar. Ka jingkiew dor jong ka petrol bad diesel ka lah ban wanrah ïa ka jingeh kaba khraw ïa ki paidbah nongleit nongwan, khamtam eh ïa ki ba pang ba shitom kiba hap ban pynkit da ki kali kamai ne ki kali jong ki riew shimet.
Halor ka jingsdang kiew dor biang jong ka petrol, kiba bun ki nongñiah kali kamai sor haba ïakren bad u nongthoh khubor, ki la ong ba ym dei tang ki nongñiah kali bad nongbuh kali kiba shah ktah. Hynrei kan ktah lut ïa baroh namar shisien ba la kiew dor ka petrol bad diesel, ki mar ki mata kata naduh ki mar bam haduh ki dawai dashin, ki tiar ki tar, ki jaiñ ki nep bad kiwei kiwei kin kiew dor lut, namar ka bai kit bai bah ka la kiew.
Uwei na ki nongñiah kali kamai sor ha Nongstoiñ u la ong ba lada ïa ka bai shong kali kin pynneh kumba ju shim ruh tang ka bai petrol kam mih shuh. Nalor kata u la ong ruh ba lada shim tam ïa ka bai shong kali ruh ka la ktah ïa ki paitbah nongleit nongwan, namar ha ka jaka ba ka bai shong kali ka long sanphew tyngka uwei u briew ki hap ban pynkiew sha ka hynriew ne hynñiew phew tyngka uwei u nongshong kali. Nalor kata shisien ba ka bai shong kali ka kiew kiba leit jingleit kin duna bha.
Halor katei ka jingkiew dor biang jong ka umphniang kali, katto katne ki nongleit nongwan ki la ong ba ha kine ki ar snem ba ka sorkar ka la pynjari ïa ka jingkhang dam, ban ïada na ka jingsaphriang jong ka khlam covid 19 kim da sngew ei ei, namar ki mar bam ba ka sorkar ka phah ruh ki poi. Hynrei lada ka umphniang kali kan poi palat shispah tyngka shi litar baroh ki mar bam mar dih kin kiew dor ar shah.
Ki la ong ba ha kine ki sngi u khaw u ba ki ju thied khyndai spah sanphew tyngka shi packet u la kiew shi hajar tyngka, ka shini na ka sanphew ka la kiew sha ka sanphew san tyngka. Wat la ka sorkar ka la pynkut noh ïa ka jingkhang dam, hynrei ka jingbym don shuh ki kam bylla kiba biang ka la ktah haduh katta katta. Ka kamai kajih bad ka ïoh ka kot ka la nang hiar arsut katba nang mih ki sngi bad kane ka la ktah jur ïa ki paitbah. Lada ka long kumne khlem artatien kan sa poi ka por jong ka jingïap thngan.
