Kiew 35 ngut kiba shah kem ha ka jingkulmar bad byrngem hiar thma ïa ka ïing u CM ha Tura

Tura, Naitung 26 : Ki Pulit ka West Garo Hills ki la ïoh kem haduh 35 ngut ki briew kiba kynshoit ban lun maw ïa ka Chief Minister Office, Tura nalor uwei u briew uba la wer ïa ki paidbah ban ïeng ïakhun pyrshah ïa ki bor Sorkar bad ban hiar thma ïa ka ïingsah u Myntri Rangbah kaba don ha Tura.
Une u briew ba wer ïa ki paidbah lyngba ki jingthoh ha ki social media, u kyrteng u Sengbath D Sangma.
Kat kum ka khubor Pulit, une u briew ula pynsaphriang ïa ka jingthoh ha ki rynsan social media ba wer ïa ki paidbad ba kin ïakhih paidbah noh nalor ban hiar thma ïa ka ïingsah u Myntri Rangbah kaba don ha Tura.
Ula kyntu ruh ïa ki paidbah ba kin pha ïa la ka jingim kumba jia ha ka 30 tarik Nailur 2005.
Haduh khyndai ngut ki briew ki la iap ha ka jingther kuli ki Pulit ha u snem 2005 katba ki paidbah ki dang ïakhih ban pyrshah ïa ka jingphiah noh ïa ka Meghalaya Board of School Education (MBoSE). Saw ngut ki briew ki la kyllon iap ha madan Chandmary, Tura katba 5 ngut ki la iap ha madan Rongrenggre, Williamnagar.
Nalor kane, la pyntip ba ki Pulit kila kem ruh ia kawei ka Nongialam Sengbhalang ba paw ka thaiñ kaba la tip kyrteng kum ka Jaynie Sangma.
Shuh shuh ki Puit ki la ïohkem sa ïa uwei na ki briew ba hakhmat eh ba kynshoit ïa ki paidbah ban thaw jingkulmar bad ban thang ïa ka jaka shah jingit ka ACHIK nalor ban lun maw ïa ki Pulit bad ki sengbhalang ba dang ïakren bad u Myntri Rangbah bad une u dei u Saleng R Marak na Damalgre.
U Marak uba ju bna bha ban kren ïa ki kyntien aiding, u dei uba kynshoit ïa ki paidbah ban thaw jingkulmar. Ka jingkem ïa uka dei kaba sienjam ba kongsan ha ka ban wanrah pat ïa ka jingsuk bad ban pynthikna ïa ka jingpynsajia ïa baroh kiba wanrah ïa ka huri hura kaba ktah ïa ka shongsuk shongsaiñ.
ïa une u briew la kem da ki Pulit syntiat ba la ïalam da ka kynhun ba kyrpang ki Pulit.
Hadien ba ka kynhun tohkit kala poi ha ïing u Saleng R Marak ha Damalgre, une u briew ula pyrshang ban phet hynrei lah ioh ban kem da ka jingkloi beh ki Pulit.
Ka jingkem ïa u Marak ka dei ka khubor ba ym don satia mano mano ruh kiba long halor ka aiñ bad ki briew kiba kynshoit ïa ki kam umsnam kin ïoh ïa ka jingpynsajia kat kum ki kam ba ki leh.
U Deputy Commissioner ka West Garo Hills, ula pynbna ïa ka khusnam pisa sha kino kino ki briew kiba lah ban ai jingtip ka ban lam sha ka jingïohkem ïa ki briew kiba kynshoit ban pynmih ïa ka jingkulmar bad hiar thma ïa ka Chief Minister Office, Tura katba dang ïaid ka jingïalang hapdeng u Myntri Rangbah ka Jylla Conrad K Sangma bad ki Sengbhalang ha ka 24 tarik Naitung.
Une u Khliehduh ka District ula pynbna ïa ka song pisa ba T. 10,000 kum ka khusnam sha kino kino ki briew kiba lah ban ai ïa ki jingtip ba donkam sha ki Magistrate ne ki Pulit ka ban lam sha ka jingiohkem ïa ki briew ba hakhmat eh kiba kynshoit. La ong ba ïa ki briew ba ai jingtip ruh yn sa buhrieh bha.