Kiba wan ai haba rieh ki dei ki nongtuh: President HNYM

Nongstoiñ, Nohprah 12: Kum shi bynta ban rakhe ïa ka sngi ka ban sa wan kaba ngi ong ka Khristmas, ka seng Hynñiewtrep National Youth Movement tnad Nongkhlaw, ka la leh leit ban leh isynei lem sha ki katto katne ngut ki longïing kiba duna ha ka ïoh ka kot, da kaba ai sngewbha da ki jaiñ kup kiba syaid kum ka jingsngew lem.
Ha katei ka sngi ka seng ka la ïoh ruh ban ot ïa u Cake kum ka dak jong ka jingkmen ryngkat, ha kaba la donlang u bah Louis Dohtdong President rangbah ka HNYM seng kmie, bah Tailan Star Lyngkhoi President HNYM WKHD, samla Lapynshai Wanñiang President HNYM tnad Nongkhlaw, ki riew rangbah jong ka shnong bad kiwei kiwei.
“Kane ka jingleh isynei ka dei kum shi bynta ban ai mynsiem wat haba ki long tang ki jingai kiba rit. Ka jingai sngew lem kam dei kaba pyni paidbah ïa ka jinglah jong ka seng, hynrei la ai ha kaba paw kaba shai. To sumar na kiba wan ai ha kaba rieh namar ki long ki nongtuh khamtam haba lah jan ka elekshon”, ong u President rangbah haba ai jingkren.
Ïa katei ka jingïalang kaba lyngkot la pynlong ha dorbar hall ka shnong Nongkhlaw kawei na ki shnong ha ka thaiñ Nongstoiñ West Khasi Hills District.