Kiba shah ktah na ka jingbthei ha Mynsngat Thangsko ki lah ban aplai jingïarap pisa

Shillong, Rymphang 16 : Ka Ophis u Deputy Commissioner ka East Jaintia Hills District ka pyntip paidbah ba ki riewshimet ne ki longïing kiba shah ktah na ka jingbthei ha ka shnong Thangsko, Mynsngat ha ka 05tarik mynta u bnai ki lah ban aplai ban ïoh ïa ka jingïarap pisa lyngba ka State Disaster Response Fund (SDRF).
Katkum ka kyrwoh na u Deputy Commissioner la ong ruh ba kino kino ki riewshimet ne ki longïing kiba shah ktah la ka long ha ka jingduh ïa ki mynsiem briew lane ngat ha ka jingmynsaw ki lah ban phah ïa ki aplikeshon sha ka ophis u Deputy Commissioner, Relief Branch, East Jaintia Hills District, Khliehriat ryngkat lang bad ki kot donkam.
La kyntu ruh ba ki kot donkam ba ki hap ban wanrah ki kynthup naduh ka kopi jong ka Aadhar Card (Ba shah ktah bad ki bahaïing), nangta ka Address bad Pin Code. Nangta haba ïadei bad ka Bank Account la ong ruh ba lada ki jingtip ba ïadei bad ka bank ki dei jong ka kurim jong uba shah ktah, kumta donkam ïa ka birth certificate jong ki khun lane ka Marriage Certificate.
Kane ka long katkum ka jingbthah ba la phah da ka ophis u Deputy Commissioner & Chairman District Disaster Management Authority, East Jaintia Hills District, Khliehriat.