Kiba pynsaphriang ïa ki dur bad video jong ki khynnah kin ngat ha ka aiñ: maham ka SCPCR

Shillong, Jylliew, 02: Ka Chairperson jong ka Meghalaya State Commission for Protection of Child Rights (SCPCR) ka Kong Ïamonlang Syiem ka la maham ïa ki paidbah ba kim dei satia ban pynsaphriang ïa ki dur jong ki heprit ha ka Social Media namarba ka aiñ kan thwet ïa kiba pynsaphriang ïa ki dur lane ki video jong ki khynnah rit kiba ngat ha kino kino ki jingjia bapher bapher.
Kane ka jingmaham jong ka Chairperson ka SCPCR ka long hadien ba ha kine ki khyndiat sngi ki la don shibun ki dur bad ki video ba la pynsaphriang ïa ka Social Media ha kiba bun ki jingjia. Don ki video ba la pynsaphriang ïa ka video jong ki khynnah ba la kynnoh nongtuh, ki dur kiba ïashoh para khynnah bad ka jingpynsaphriang ïa ki dur bad ka video jong ka jingjia kaba la jia dang shen ha ka shnong Nongrah, Shillong ha kaba arngut ki shipara ki la shah pynïap ha la u jong u kpa.
“Ka jingpynsaphriang ïa ki dur bad ki video kan ktah ïa ka jingsngew jong ki bahaing hasem bad kumjuh ruh ïa ki khynnah rit bad wat ïa ka jingmut jingpyrkhat ka jong ki,” ong ka Chairperson ka SCPRC ha ka jingïakren bad ki lad pathai khubor ha ka sngi Palei.
“Nga phah ïa u kyrwoh sngewlem sha kato ka longing kaba la duhnoh ïa ki khun ar ngut kaba long ka jingjia kaba sngewsih kthang bad lehse ka jingjia ka bym ju kham jia koit. Ngi sngewlem khamtam ïa ka kmie jong ki arngut ki khunlung, ïa ka Meiieid bad ïa ka Kmie jong uto u rangbah (Jeofreson Jana) uba leh ïa kane ka kam dusmon katno ka long ka jingpangnud bad ngi sngewlem bad baroh kawei ka pyrthei ngi sngewlem. Ngi ïoh ïa ki khubor bad ki kyrwoh ba ki paidbah ki phah katno ka jingsngew pangnud, kim lah ban batai bad kim lah ban sngewthuh balei ka jia kumne. Kata ka dei ka kamram jong ki Pulit ba kin wad ïa ki daw lehse ka daw ka long ba u briew u dei uba ju im ha ka dih ka bam ne u don ha ka jingpynngad ka khlieh ne ngim lah ban ong,” ong ka Kong Syiem.
“Lehse ka lah ban don ka daw kaba kham ïar kat haduh ban shu leh dusmon kumnto,” la ong ka Kong Syiem haba pynpaw ïa ka jingsngew lyngngoh halor ka jingpynïap jong u kpa ïa ki jong ki khun kaba la long ka jingjia kaba la pynsuhjer ïa ka imlang ka sahlang.
Ka la ïathuh ruh ba ki dkhot jong ka SCPRC bad ka Meghalaya State Commission for Women ruh kin sa leit ïakynduh biang ïa ka kmie bad ïa ki bahaing hasem jong kine ki arngut ki Heprit ha Nongrah ha kaba ïadei bad ka jingjia khnang ban ïarap lem ha kum kane ka jingjia kaba sngewsih.
Ka la ïathuh ruh haba ki paidbah ki phah ïa u kyrwoh sha ka kum ka Chairperson bad sha ki dkhot jong ka Commision ki da pynpaw ïa ka jingsngewkhia halor ka jingpynsaphriang ïa ki dur jong ki arngut shipara bad ïa ka synduk ba la pynthiah ïa ka met jong ki.
“Ki don (napdeng ki paidbah) kiba ong ïa nga, ba kim nang ïohthiah shuh. Katno ka ktah bad ka jingsheptieng bad ka jingsngew shyrkhei ïa kum kane ka jingjia. Nga sngewsih ba ki don ki dur jong ki khynnah ki bym dei ban don ha kito ki dur jong ki shipara ki la mih lang. Ngi sngewkhia kum ka Commission bad ka long kumba shimnoh ïa ka hok jong ki bad haduh katno ka ktah ïa ki kmie ki kpa bad ïa ki bahaing hasem haba ki poi kito ki video. Katno ki sngew pangnud ban peit biang ïa kiei kiei kiba pynkynmaw watla ki la pyrshang ban pynklet noh ïa ka jingsngewsih,” la kren sngewkhia ka Kong Syiem.
“Nga kyrpad ïa ki paidbah, haba phi ïoh ïa kum kito ki jait video nga shu kyrpad, sngewbha lada ka poi sha phi ïa ki dur, ki video wat pynsaphriang sha kiwei pat hynrei pyndam noh hangto hangto. Ai ba ngin long kiba don ka jingkitkhlieh,” la kyrpad ka Chairperson jong ka SCPRC ïa ki paidbah.
“Ha ka jaka ba phin phah pateng sha ki paralok, kan jin da la bha ba phin phah sha ki Pulit, sha ka Commission ne ïa kino kino ki bor ba dei peit khnang ba kin dup lah ban ai jingïarap hynrei wat ïa thad ïa ka jinglong jong ngi bad kaba dei ban ïaid katkum ka ain, kan ïaid beit katkum ka aiñ,” ka la ong.
“Nga kwah ban maham ba ka don ka bynta jong ka aiñ kiba ktah ba ngim dei ban pynidur ïa ki dur jong ki khynnah rit ne wat ban thoh kyrteng kata, katkum ka Section 74 jong ka Justice Juvenile Act bad ka Section 228 (A) jong ka Indian Penal Code (IPC) kaba khang ban pyni ïa ka dur jong ki khynnah rit,” la ong kane ka Chairperson jong ka SCPCR.
“Kine ki jingjia kiba ladep, ka aiñ kan sa leh la kamram,” la maham ka Kong Syiem bad ka la kyntu ruh ïa ki paidbah ba kin sngewbha ban pyndam noh ïa ki dur bad ïa ki video bad long ki briew kiba shimkhia ïa kum kine ki jingjia bad ban don ïa ka jingkitkhlieh,” ka la ong.