Kiba pep skul shiteng por ki lah ban ïakhun ïa ka eksam SSLC jong ka MBoSE, ong ka sorkar jylla

Shillong, K’ Lyngkot 16: Ka Sorkar Jylla ha ka sngi Thohdieng ka la rai ban pyntreikam ïa ka kyndon ban pynrung skul lane pynrung kyrteng ïa ki kyrtong shimet ne private candidate ba kin ïakhun ïa ka eksam Secondary School Leaving Certificate (SSLC) jong ka Meghalaya Board of School Education (MBoSE).
Halor kane hadien ba dep pynïaid ïa ka jingïalang ka kynhun Myntri, u Myntri Rangbah Conrad K Sangma ula ong, “Ngi la rai ban pyntreikam ïa ka kyndon ban pynrung skul bad pynrung kyrteng ïa ki kyrtong shimet na ka bynta ka eksam SSLC hapoh ka MBoSE”.
U la ong ruh ba kane ka sienjam ka thmu ban ai ka lad ïa ki khynnah skul ki bym lah ban pass ïa ka eksam matric lane pep skul noh shiteng por hadien ka kyrdan Upper Primary ba kin ïoh leh ïa ka eksam SSLC.
U la bynrap, “Ki don bun ki khynnah skul ha ki snem ba la leit noh ki bym shym la lah ban pass ïa ka eksam matric bad ki don ruh bun ngut kiba kut da kaba sangeh leit skul hadien ka jingpule Upper Primary ha ka por ba ki kiew sha ka kyrdan Secondary namar ki daw bapher bapher.”
U Conrad ula ban jur ba kane ka rai ban ai ka lad ïa ki khynnah skul kiba kwah ban ïakhun ïa ka eksam SSLC ba ki lah ban leh ïa kata, wat hapdeng ka jing fail ha ki sien ïaleh ba la dep lane sangeh noh ka jingleit skul shiteng por.
U la bynrap, “Ngi kwah ban ai ka lad sha ki bad nga thikna ba kane kan pynshlur ïa bun ki khynnah, ïa kiba namar ki daw bym lah ban tip, kim shym la lah ban pass ïa ka eksam matric. Bun ki phaikhmat haba don kum kane ka lad ka lynti.”