Shillong, Naiwieng, 01: U President ka Khasi Students Union (KSU) u samla Lambokstar Marngar ha ka sngi Thohdieng u la kynthoh tyngeh ïa ki kynrum ki kynram kiba la mih ha kine ki khyndiat sngi hapoh ka skulbah North Eastern Hill University (NEHU) da kaba ong ba ki briew kiba nabar kin ym nud bad kin ym shlan lymda ka don kaei kaei kaba napoh.
“Ngi ïakren ïa ki jingeh bad ki kynrum kynram kiba don ha ka jingeh hapoh ka skulbah, hynrei ngi hap ban buh jingkylli ruh ym tang ïa ki samla pule hynrei wat ïa ki nonghikai, kaei ka daw kaba mih na ka kynrum kynram, hato ka dei ka daw na shabar ne ka dei ka daw na la rympei,” ong une u nongïalam ka KSU haba kren ha ka Khasi General Freshers Meet, 2024 ba la pynlong da ka KSU NEHU Unit ha kaba la pynskhem ïa ki nongkitkam na ka bynta ka samoi treikam jong u snem 2024-2025 bad la pynkup burom ruh ïa ki samla pule Khasi kiba la pas bha bad kiba la pyndep ruh ïa ka Ph.D jong u snem 2024.
“Kiba nabar kin ym nud bad kin ym shlan lymda don kaei kaei kaba napoh. Ka la dei ka por ïa ngi ki samla ban pyrkhat thymmai la ngin ïai bteng ban aiti ïa ka bor pyrkhat pyrdaiñ sha kiwei ki ki jaidbynriew ne ban shimti hi halade ban pynïaid ïa kane ka skulbah,” u la bynrap.
Haba ïathuh ba ka KSU ka la pyrshang ban wanrah da ki trai ri trai muluk ban shong ha ka shuki ba hakhiehduh ha NEHU, u samla Lambokstarwell u la ong, “ha ki snem ba la leit noh, ka KSU ka la pyrshang ban ïakren bad ki nonghikai jong ka skulbah NEHU kumno ban wanrah da u nonghikai Khasi ban shimti ïa ka shuki Vice Chancellor hapoh NEHU hynrei kaba sngewsih ka long ba ka la mih pynban ka jingïatan tyllai para Khasi.”
“Ka dei kata ka daw tynrai kaba kiwei kiba nabar ki ïohi ïa ka jingtlot jong ngi ki sa ïoh lad ban shim ïa u lakam ban pynïaid ïa kane ka skulbah,” u la ong.
U la kyntu ïa ki samla pule kiba la shah pynkup burom ha kane ka sngi ba kin long ki atiar shisien ka sngi da kaba buh hakhmat ïa ka thong ba long ki nongsaiñdur ïa ka imlang ka sahlang.
U Prof. Demond Kharmawphlang u nonghikai jong ka skulbah North Eastern Hill University (NEHU) haba kren ha kane ka sngi u la ong ba ka kynhun jong ki nonghikai skulbah NEHU ki la ai ka jingkyrshan bapura ïa ki samla pule kiba don hapoh ka shatri jong ka NEHUSU bad ka KSU NEHU Unit kiba la khang tala ïa ka ophis treikam jong u Registrar u Colonel (Retd) Omkar Singh bad ban dawa ïa u Vice Chancellor jong ka skulbah NEHU u Prof. PS Shukla ban weng mardor na ka kam ïa u Registrar bad ïa u Deputy Registrar Academics) u Amit Gupta ki bym tip wat tang ïa ki kyndon pynïaid kam ophis hapoh ka skulbah.
U la kyntu ïa ki samla pule kiba dang shu rung thymmai ha skulbah NEHU ba ki dei ban long kiba phikir bad kiba husiar ïa ki kynhun shitniam kiba la bsuh khlieh hapoh ka skulbah NEHU ban phon ban pah ïa ki samla pule da ki ktien pynbiej bad ki ktien jali jaum katba shalyndet ki don da kiwei pat ki jingthmu.
U President jong ka KSU NEHU Unit u samla Sandy Sohtun ha kane ka sngi u la takraiñ tyngeh ïa ki bor pynïaid jong ka skulbah NEHU khamtam ïa u Vice Chancellor bad ïa u Registar halor ka jingthungkam ïa u briew ban hikai ha ka Deparment of English ka skulbah NEHU Tura Campus ha kaba wat tang ban kren ïa ka ktien Phareng ruh um nang.
Une u nongïalam jong ka seng u la ïathuh ruh ba ka jingkhang tala ïa ka ophis treikam jong u Registrar ka long namarba manla ki khep haba ka seng ka ju leit ud leit nam hynrei na ka liang jong u Vice Chancellor bad u Registrar kim ju patiaw haduh kine ki sngi bad wat tang kawei ka jingdawa ruh kam shym la urlong satia.
