Shillong, Nailar 19 : U MLA ka Nongstoiñ Bah Gabriel Wahlang u la ong ba um salia ïa ka jingshah kynnoh lane ka jingshah beiñ namar ka jingleit pynïasoh jong u sha ka NPP namar u sngewthuh ba kam myntoi ban don ha ka Liang Pyrshah lada um lah ban ïarap ïa ka khia ka shon jong ki paidbah ka Nongstoiñ constituency.
Haba kren hadien ba la pdiang burom ïa u sha ka party NPP, utei u MLA barim ka Congress u la ong, “Na bynta ka bha ka miat jong ka Nongstoiñ constituency ngam salia lada kiwei ki kynnoh ki kren beiñ ba nga pynïasoh sha ka NPP.”
Shwa kane u Bah Gabriel u la ong ruh ba um lah ban shu ai daw ba tang na ka daw ba u don ha ka Liang Pyrshah un ym lah ban ai jingïarap ïa ki paidbah. “Ha kano kano ka constituency kaba donkam ïa ka roi ka pa ka donkam beit ïa ka sorkar. Kumta ka jingdon jongnga ha ka NPP nga kyrmen skhem ba u Myntri Rangbah ryngkat ki arngut ki Symbud Myntri Rangbah kan pynkhlaiñ bad ba ngan nang lah ban ai ka jingshakri kaba kham bha ïa ka Nongstoiñ Constituency bad ïa ka West Khasi Hills hi baroh kawei.”
Na ka liang jong u, u la pynshai ruh ba ka jingwan jong u sha kane ka party kam dei satia ka rai marwei hynrei kadei kaba ki la da shim da kawei ka sur ryngkat bad ki 600 ngut ki nongïalam ban phai noh sha ka NPP.
“Ngi kwah ruh ban pynpaw sha ka pyrthei ba kaei kaba ki paidbah ki kynnoh ba ka party NPP kadei kaba sniew hynrei da ka jingdon ka jongngi kan pynpaw ïa ka jingbha jong kane ka party,” u la ong.
U Bah Gabriel u la ong ruh ba ka burom kaba khraw kadei eh sha ki arngut ki paralok MLA jong u na ka Congress ba kynthup ïa u Dr. Celestine Lyngdoh bad ruh ïa u Bah Charles Marngar namar lada kim wan lang ma ki, ma u marwei un ym poi shaei shaei ruh.
U la ong ruh ba namar ka thain bun ki shaniah ha u dewiong kumta da lade u la kren bad u Myntri Rangbah ban ailad ïa ka khaii dewiong katkum ki kyndon jong ka ain bad ruh ban plie shuh kham bun ki coke factory katkum ki lynti ka ain namar bun ki briew ha katei ka constituency khamtam ha West Khasi Hills ki im ja da kane ka kam.
“Ki briew jongngi ki imja na u dewiong, na ka dieng bad na u maw u shyiap hynrei kine baroh mynta ki la nang shah khang. Kumta phi tharai nga ngan shong bad ngan ong ba ngan ym lah leh ei ei. Kumta kadei ka kamram jongnga ban ïarap katto katne ïa ki paidbah da kaba don ha ka sorkar. Ngi don ruh ïa ka Child & Maternity Hospital bad ki jingdonkam ba bun bha kiba ngi donkam. Ngi lah ban shah kren bein hynrei ngi kwah ban pynpaw da ki kam,” u la ong.
Shuh shuh u ong ba kum ki dkhot kiba thymmai ha ka sem NPP kin trei borbah shuh shuh khnang ba ha u snem 2028 kin lah ban wan biang ha ka bor.
