Khliehriat Naitung 20 : U Deputy Commissioner, East Jaintia Hills District, u Abhilash Baranwal, IAS, u la pynmih ka hukum ban bthah ba baroh kiba die dukan heh bad dukan rit bad baroh ki paidbah ki dei ban shim beit ïa ka pisa nar 10 tynga kaba la pynmih da ka Reserve Bank of India bad lada lap ïano ïano kiba kyntait ban shim ïa kane ka pisa nar yn pynngat ïa ki hapoh ki kyndon aiñ 188 IPC.
Ka long shisha kaei kaei kaba sngewlyngngoh ba ka pisa 10 tyngka nar kam ïaid ïew ha East Jaiñtia Hills District, namar ki nongdie dukan la ki dei ki dukan heh ne ki dukan rit ruh kim ju treh ban shim ïa ka pisa 10 tyngka nar. Halor kane, u samla Arkijuh Dkhar, uba na ka shnong Khliehriat, myn ha ka 20 tarik u ïaïong 2023 u la buh da ka jingthoh hakhmat u Deputy Commissioner bad ong ba ki paidbah hapoh ka disrict kim da mon than ban shim ïa ka pisa T10 tyngka nar ba la pynmih da ka Reserve Bank of India.
Shuh shuh, katkum ka jingthoh ba la buh da u bah Arkijuh Dkhar, u la pynpaw ruh ba watla kane ka pisa kam dei kaba beaiñ, hynrei ka wanrah jingeh bha ïa ki paidbah kiba bat ïa ka pisa T10 tyngka nar namar ba ki nong die dukan kim treh ban shim ïa kane ka pisa nar, ha kajuh ka por, u la ong ba kane ka wanrah ïa ka jingsngew lyngngoh ïa kiba bun khamtam kito ki briew kiba wan na bar ka district bad na bar ka jylla bad ka long ruh kaba sngew jah burom ha khmat kito kiba wan na bar ka district bad na bar ka jylla.
Kum ban shu bynrap, haba pyrshang ban kylli na kiba die dukan halor kaei ka daw ba kim treh ban shim ïa ka pisa 10 tyngka nar ki la jubab ba kim tip ïa kaei ka daw, hynrei kim treh pat ban shim. Kane ka jia ha baroh ki dukan ha East Jaiñtia Hills District kynthup ki dukan ki trai jylla bad ki dukan jong ki bar jylla.
Halor kane u Deputy Commissioner u la pyllait da ka hukum bad la pynshai ruh ba katkum ki kyndon section 6(1) jong ka Indian Coinage Act 2011, la pynpaw shai ba baroh ki pisa khutia ki dei kiba long aiñ, kaba mut ba kim dei kiba beaiñ ha ka ïa die ia thied, kumta la bthah ba baroh ki dei ban pdiang ïa ki pisa khutia ne ki pisa nar kynthup ruh ka 10 tyngka nar.
