Kiba ïoh kam ruh dei tang kiba don jingïadei lypa bad ki heh ki haiñ : FKJGP

Shillong, Nailur 26: Ka Federation of Khasi Jaintia and Garo People (FKJGP) ha ka sngi Nyngkong ka la khot lawer sha ka jingïaid paidbah ïa ki samla kiba ym ïohkam satia wat hadien ba ki la pyndep ïa ki jingpule bapher bapher kaba yn pynlong ha ka 21 tarik Risaw 2022 kaba yn sdang na motphran bad pynkut ha Madan Malki.
Haba kren sha ki lad pathai khubor u President ka seng u Bah Dundee C Khongsit u la ïathuh ba na ka liang ka seng ka la lap ba ki don kumba 1,600,000 ngut ki samla kiba ym ïohkam satia wat hadien ba la pyndep ïa ki jingpule kaba bunsien ka ïalam ruh sha ki kam kiba sniew ïa ki samla. U la ong ruh ba wat ki kam kiba thylli ha kiba bun bah ki tnat sorkar kam shym la pyndap satia bad wat kito kiba pyndap ruh la shu leh sop sop bad kiba ïohkam ki dei tang kito kiba don kiba ithuh ithaw ïa ki heh ki haiñ.
Haba ïadei bad ka jingsuba ha ka thungkam thung jam u la ong ba ka sorkar ka dei ban ai lad ïa ki samla kiba wad kam ban peit biang ïa ka jubab ba ki thoh lada kim sngewhun ïa ki mark ba ki ïoh bad ruh ha ka por ba shim interview dei ban ring beit da ki video khnang ba ki samla kiba ym sngewhun ïa ka jingïoh mark kin lah ban pan bad peit biang ong u Bah Dundee.
Shuh shuh shuh u la ong ba na ka liang ka seng ka sngewdei ba ka sorkar kan weng noh ïa ka rukom thungkam contract namar kiba bun kiba trei ha kane ka kam ki ju duh kam noh hadien ba ki la tyrei la bun bun snem bad ba ka dei ruh ka lynti ba ki katto katne kiba ym dei hok ban ïohkam ki ju ïoh rung lyngba kane ka kam contract.
U la ong ruh ba na ka liang ka seng ka khot ïa ki samla ym tang ïa kiba kwah ban ïoh ïa ka kam sorkar hynrei wat kito kiba don jingthmu ban seng kam lajong ban wan sha kane ka jingïalang ban dawa ba ka sorkar kan kham pynbun ki lad ban ai jinghikai ïa ki samla ban seng kam lajong bad wat ban ai baiseng ruh ba kin lah ban sdang ïa ka kam jong ki.
U la ong ruh ba na ka liang ka seng ka pynpaw ïa ka jingbym sngrew ïahap ïa ka jingkhot ka sorkar ïa ki Consultancy na sha bar ban leh ïa ki ba bun bah ki kam ha ki tnat sorkar kiba oher bapher kiba ha ka jingshisha kiba bun na ki tari muluk ki lah ban leh ïa kane ka kam. “Kane ka jigkhot ka sorkar ïa ki Consultancy ka pynduh jigmyntoi shibun nalor ba ka tulop kaba heh kaba kan siew sha ki nangta ruh kiba trei bad kine ki Consultancy ki dei beit kiba na sha bar jylla”, u la ong.
Shuh shuh u la ong ba na ka liang ka sorkar jylla ka dei ruh ban shim khia ban pynthikna ba ki post kiba hap ha ka Grade IV ha ki ophis sorkar pdeng ban ïoh beit da ki trai muluk kumba ju leh ha kiwei pat ki jylla.
“Lada phi peit ruh ha ki Private Company khamtam eh ha ki ban kiba bun ki kam kiba heh ki ïoh beit tang ki bar jylla katba ki kam kiba rit ba ria ïoh ki trai muluk, te ngi kwah ban ong ba ka sorkar ka dei ban shimkhia ïa kane ka bynta” u la bynrap.