Kiba bun ki shnong ha ka thaiñ Garo Hills ki la don jingma na ka jingïakajia pud, ong ka GSMC

Shillong, Nohprah 07: Ka Garoland State Movement Committee (GSMC), Pedaldoba Regional Unit ka la kyntu ïa u Myntri Rangbah u Conrad Sangma ban ïapynbeit noh ïa ka jingïakajia pud hapdeng ka Meghalaya bad Assam hapoh ka Raksamgre Civil Sub Division lyngba ka border management.
Ka GSMC ka la ong ba ka Meghalaya ka dei ka bynta jong ka Assam, bad ïa u pud u sam ym pat ju pynwandur ne ban buh laiñ naduh mynshwa bad dei halor kane ba ki la mih ki kynrum kynram ki jingïakajia kaba la wanrah ka jingeh ïa ki rukom synshar bad kumjuh ruh ka la wanrah ka jingeh kaba khraw ïa ki nongshong shnong naduh u snem 1972.
“Kane ka jingïakajia kaba khlem pud ka la wanrah ïa u shiah uba thar bad uba ktah ruh ïa ka roi ka par ha kine ki thaiñ bad ka la lam sha ka jingphiah bad ka jingbym ïaid beit jong ki kam ha khappud ha kaba manla ka por ka la ktah ruh ïa ki kam pynroi jong ka sorkar ha ki shnong bapher bapher,” ong u Unit Chairman ka GSMC u Rimjen Ch Sangma ha ka jingkyrpad sha u Myntri Rangbah.
U la ong ba ka jingkyntur pud ha shilynter jong u pud u sam ka Meghalaya u la ïaineh kum ka jingma bad ka jingaiding kaba lah ban jia ka jingïaumsnam. Ka wah Jingiram, kaba dei ka tributary jong ka Brahmaputra bad kaba dei ruh ka wah kaba tuid na u pud u sam ka Meghalaya lyngba ka Garo Hills, ka la kynriah mynta sha ka bynta ba shathie ha kine ki snem ba la leit, ha kaba kane ka la pynlong ïa ki nongshong shnong na Assam ban kyntur shapoh u pud u sam ka Meghalaya lyngba ka rep ka riang bad ka jingshna ïing, ong u Rimjen.
Haba ïasyllok bad ki tymmen ki san ka shnong bad ki nongïalam shnong ki pynpaw ba u pud u sam ba nyngkong ba la kdew lyngba ka Rongsai Bazar bridge, Sapang Pahar, Mangnakopa, Sildubi, bad Jolsimina la ithuh mynshwa jong ka jingpynphiah hapdeng ki artylli ki jylla, ba la tip da ka ‘Samson Geography’, kaba phai halor ka Garo Hills, kaba pynskhem ba kine ki shnong naduh ki longshwa manshwa ki hap hapoh u pud u sam ka Meghalaya, da ka jingtuid ka wah Jingiram kaba ïaid beit napoh Meghalaya.
U Rimjen shuh shuh u la ong ba ki shnong kum ka Pedaldoba, Rongsai, Bolsaldamgre, Balbalgre, Lower Kongrapara, Thakurbilla, bad ka Forest Beat Office jong ka Garo Hills Autonomous District Council (GHADC) la wanrah hapoh u pud u sam jong ka Rabha Hasong Autonomous Council (RHAC) kumba la pyni ha ka jingjurip, katba u pud ba la kdew bad pynïeng ha ki snem 1920, kynthup ki païa jong ka jingkieng Rongsai Bazar bad kiwei ki jaka kiba la long kum ki laiñ pynïaphiah ki la jah na ka daw ka jingtwa khyndew bad kiwei kiwei ki daw.
U la ong ba ki jingkyllaiñ ki mih na ka jingkynriah jong ka wah bad ka jingsam ka Assam ïa ki kot ki sla sha ki nongshong shnong kiba kwah wan phai sha u pud u sam ka Meghalaya ki pud ki kiba kynthup ïa ka Kharsengdap, Khokapara, Kalapara, bad Besorkona ha kaba kane ka la nang aiding shuh ïa ki jingïakajia hapdeng ki nongshong shnong.