Nongstoiñ, Rymphang 13: Ka Ophis jong ka District Legal Services Authority West Khasi Hills District Nongstoiñ, ha ka sngi Thohdieng ka la pynlong ïa ka jingïaid Rally ha ka shnong Pariong Eastern West Khasi Hills District, pynbud ruh da ka Awareness Prokram hapoh ka skul Pariong Presbyterian Higher Secondary School.
Kane ka prokram ka long shibynta ban ai ïa ka jingpynshai paidbah halor ka jingma kaba mih na ka jingshongkha khynnah bad kumjuh ruh halor ki lad jingïarap, ki aiñ jingïada na ka bynta ki khunlung khynnah.
Ha kane ka sngi la sakhi ïa ka jingwan ban ïashim bynta da ki nonghikai ha ryngkat ki khynnah skul kiba la ïaid da ka rally, ryngkat kaba rah ïa ki placard lem bad ka jinghylla jingpyrta kum dak ban pynpaw ïa ka jingpyrshah halor ka jingshongkha khynnah.
Hadien ka rally la ïoh ïa ka jingpynshai paidbah ha ka Prokram lyngkot ba la pynlong hapoh ka skul Pariong Presbyterian Higher secondary School. Ki nongïasaid aiñ kiba kynthup ïa ka kong L. Nongrem ALADC bad u bah D.D Diengdoh ALADC, ka kong P.Marweiñ na ka Ophis DCPO, ki la pynshai paidbah halor ka jingma kaba mih na ka jingshongkha khynnah, kumjuh ruh halor ki lad jingïarap bad ki aiñ ïada na ka bynta ki khunlung khynnah.
Ki nongkren ki la ban jur halor ki jingma ba bun lada shongkha khynnah palat, kata ka long naduh ka jingktah ïa ka koit ka khiah, ka bor pyrkhat pyrdaiñ bad kiwei kiwei ki jingeh ki ban mih hadien habud, hynrei kongsan eh ka long ba ka aiñ ruh kan leh ïa la ka jong ka kam pyrshah ïa kito ki briew kiba shongkha khlem pat dei por.
