Kiar na ki jingdih ba sniew, kyntu u Myntri ïa ki samla ha ka Wailadmiki Shylla Young Festival’

Jowai, K’Lyngkot 23: Ïa ka ‘1st Wailadmiki Shylla Young Festival 2026’ ba la pynlong da ka National People’s Youth Front (NPYF) 2-Jowai Constituency la pynkut noh mynta ka sngi Thohdieng 23 tarik u Kyllalyngkot ha Madan Thad Mukhla, West Jaiñtia Hills District halor ka phang kaba ong “Say no to drugs and say no to aids”.
Ha kane ka sngi pynkut da ki hajar ngut ki khun samla bad ki nongshong shnong hapoh ka 2-Jowai Constituency kila wan ban ïashim bynta shitrhem ha ki jingïakop bapher bapher naduh ka jingïalehkai phutbol, ka tan tyllai, dat Moo Point, ka Drill, pynher kot kudi, pynher Dingkum, ka jingïakop rwai, ka jingïakop shad ba bun jait, ka jingthoh Slogan bad ka jingïakop Rang bad Thei bhabriew, ha kaba ki nongjop baroh kin ïoh da ka song pisa ha la ki jong ki jong ki kyrdan.
U MLA ka 2-Jowai Constituency ma Wailadmiki Shylla uba dei u Myntri ka kam ïalehkai ha ka jingkren sha ki lad pathai khubor ula ong hapoh ka Jylla haduh 60 percent na ki nongshong shnong ki dei ki khun samla kiba don hapoh ka rta 20 snem bad kane ka la pynlong ïa u kum u MLA ban plie ïa kane ka lad bad ka kabu ksiar na ka bynta ki khun samla ba kin ïoh pynpaw ïa la ka sap ka phong ba ki don.
Kum u MLA u thrang bad angnud ban pynkiew ïa ka kam ïalehkai Sports hapoh ka District bad ha ka jylla baroh kawei bad ban pynneh pynsah ïa ka riti ka dustur la jong lyngba ki jait jingïalehkai tynrai, ula ong kane ka Festival ba nyngkong mynta u snem ka la long kaba jop da ka jingïatrei lang jong ka Organizing Committee bad ki Unit bapher bapher kiba la wanrah ïa khun samla ban wan ïashim bynta.
“Kane ka jingwan ïashim bynta ki paidbah bad ki khun samla ka la ai mynsiem ïa u kum u nongmihkhmat bad kane ka pyni ka jingsnohkti lang jong ki ïa kane ka jingthmu ba bha jong nga,” ong ma Wailadmiki Shylla.
Na ka liang u MLA ula pynsngew, “Kiba bun na ki khun samla ha kine ki sngi mynta ki la pynlut kai ïa ka por jong ki ha ki Mobile Phone bad dei na kane ka daw u kwah ba kin mih noh sha ki madan ïalehkai bad ban pynlut ïa ka por ha ki jingïalehkai, khnang ba kin lait na ki jingdih pynbuaid bad ki kam awria ba bun jait.”
U ma Wailadmiki ula kular ruh ban bteng ïa kane ka Festival ha kine ki snem ban wan da kaba yn pynbha bad ban pynheh shuh shuh ïa ka. Ha kane ka sngi la sam ruh ïa ki symbai sha ki nongrep hapoh ka Constituency.
Na ka liang ka Meghalaya State Skill Development Society (MSSDS) lyngba u ma Lambormi Suchen uba dei u Skill Development Officer ka West Jaiñtia Hills District, ula pynsngew ba ka ophis ha kane ka sngi ka la wanrah ïa ki mar ki mata kiba bun jait kiba la shna da ki briew la jong bad ha ka juh ka por ki don ruh ki briew ki ban ïarap ban pynïoh kam pynïoh jam ïa ki khun samla.