Tyrsad, Nohprah, 21: Ka Sarajanai Village Organization (VO), Tyrsad Umkseh kaba hap ha Mawphlang C&RD Block ka la pynsngewthuh ïa ki khynnah bad ïa ki samla jong ka shnong halor ka jingpep skul shiteng por bad halor ka shongkha khynnah kaba la ïashim bynta da ki khynnah, ki samla bad ki longkmie.
Haba kren ha kane ka sngi u Bah Staising Kharbteng uwei na ki riew rangbah ba ju don bynta ha ka imlang sahlang uba long ruh u Sub Inspector of Schools jong ka South West Khasi Hills District u la ong ba ki khynnah ne heprit ki dei ka lawei ka ri. Namarkata, u la ong ba ka long kaba donkam ba kin don ka jjngthrang ha ka jingim jong ki, ba kin jingsngewtynnad ban pule kot, ka jingkitkhia ki kmie ki kpa khnang ba kin lait na ka jingpep skul shiteng por bad ban kiar na ka jingïalang samla hapdeng ka jingpule kaba lah ban lam sha ka shongkha khynnah.
Ka Kong Daphira Sohkhia kaba dei ka Mid Level Health Care Provider hapoh ka Tyrsad Health and Wellness Center, ka la pynkynmaw ba ka jingshongkha khynnah ka ktah ïa ka koit ka khiah, ka pule puthi bad shah ktah ha ki kyndon aiñ.
Ha kane ka sngi la ïoh ïa jingkren pdiang sngewbha na ka kong Biantymary Rani, jingkren ai khublei na ka kong Midoris Umdor kum ka Secretary jong ka Sarajanai Village Organization (VO), Tyrsad Umkseh, ka jingkyntu kynpham na u bah David Khasaiñ u Rangbah Shnong ka Shnong Tyrsad Umkseh bad la pynïaid ïa ka jingïalang da ka kong Ibakordor Rynjah.
