Ki Village Organisation ki pynmyntoi ïa ka pyrkhat pyrdaiñ: MLA Nongstoiñ
![](https://mawphor.com/wp-content/uploads/2022/05/Sports-2-750x430.jpg)
Nongstoiñ, Naiwieng, 28: Ka kyhnun jong ki Self Help Group hapoh ka shatri jong ka Village Organisation kiba don ha ka shnong Siejlieh, kawei na ki shnong kaba don ha sor Nongstoiñ, ka la kynjoh shi snem mynta ka sngi 28 tarik Naiwieng 2022.
Kum shi bynta ban ïa kmenlang baroh, ki VO ba kynthup ïa ka Langdait Mylloiñ Village organisation, Ngintei Ïalawei Mawthongthang Village organization, Pdengshnong Self Help Group bad kiwei kiwei, mynta ka sngi ki la ïoh ban rakhe lehkmen ïa katei ka jingdap 1 snem, ha kaba la pynlong ïa katei ka jingïalang ha phyllaw skul sorkar kaba don ha katei ka shnong Siejlieh.
U bah Macmillan Byrsat MLA ka Nongstoiñ konstitwensi u la long kum u kongsan, ryngkat ka jingïasynranlang u bah Kevin Wanniang Cluster co ordinator, u bah Happiness Tympuiñ sordar ka shnong Siejlieh, u samla Deborlan Kharsyntiew Secretary ka shnong Siejlieh, kiwei kiwei ki riew rangbah jong ka shnong, ki riew rangbah jong ka thaiñ bad ki paidbah jong ka shnong kiba la wan ban sakhi lang ïa katei ka sngi.
U kongsan haba ai jingkren u la ong, “Ka jingdon jong ki VO ha ka shnong ka wanrah ïa ka ïoh ka kot ha ki longïing longsem bad ka wanrah ruh ka jingpynmyntoi ïa ka pyrkhat pyrdaiñ ha u briew bad ki nongshong shnong”.
Na ka liang jong u, u la ai khublei bad kitbok kit rwiang sha baroh ki dkhot bad nongïalam jong ka Village Organisation, ba kin nang trei shitom bad ban nan ïai kiew shakhmat ha ki liang baroh, khamtam ban kyntiew ïa ka rukom im rukom pyrkhat, khnang ban roi bad kiew ha ki liang baroh ha ka imlang sahlang.