Amlarem, Nailur 23: Ka District Legal Services Authority (DLSA), West Jaiñtia Hills, ryngkat ka jingïatreilang bad ka ophis u Superintendent of Police, ka la pynlong ïa ka ‘Sensitization Programme’ halor ka Court Procedure na bynta ki dkhot jong ka Village Defence Party (VDP) ha Conference Hall, Sub-Divisional Court Building, Amlarem.
Ka thong jong kane ka programme ka long ban kyntiew ïa ka jingïarap jong ki dkhot VDP ha ka jingïada paidbah bad ban pynsngewthuh bniah ïa ki rukom bishar aiñ bad ban pynshlur ïa ka jingïatreilang hapdeng ki pulit bad ki paidbah.
Ha ka jingkren pdiang burom u ma L. M. M. A. Rymbai, Judicial Magistrate First Class, Amlarem, ula kdew ïa ka jingdonkam jong ka jingïashim bynta jong ki paidbah ban tei ïa ka jingsuk ha shnong ha thaw. U ma R. Pde, COVDO, West Jaiñtia Hills, ula batai shaphang ki jingkitkhlieh jong ki VDP katkum ka Meghalaya Village Defence Organisation Rules, 2008. U ma N. Sumer, Assistant Public Prosecutor, ula ong ba ki VDP ki dei ban ïarap ha ka jingtohkit bad ka jingpynïaid hok ïa ki case, katba u Inspector D. Lamare, Officer-in-Charge, Amlarem Police Station, ula pyni bniah ïa ka jingdonkam jong ki VDP ha ka jingthoh FIR bad ka jingpynkhreh charge sheet.
Shuh shuh la pynkynmaw ruh ïa ki kam ba ki VDP ki la trei naduh ki snem ba la leit noh, ha West Khasi Hills bad West Jaiñtia Hills ki don haduh 216 tylli ki VDP bad palat 3,000 ngut ki volunteer kiba la ïarap ïa ki pulit ha ki jingtohkit pyrshah ïa ki kam sniew, ki kam runar bad wat ban buddien ïa ki paidbah kiba donkam jingïarap.
La pynshlur ruh ïa ka jingtreikam jong ki Para Legal Volunteers (PLV) kiba dei hapoh ka jingpeit jong ka Meghalaya State Legal Services Authority. Ki PLV ki long kum ki nongpynïaid hapdeng ka aiñ bad u paidbah, da kaba ai jingïarap ha ka jingregister FIR, ban ai jingtip halor ki skim sorkar bad ban pynshai ïa ki hok tynrai jong u paidbah. Kane ka jingïatreilang hapdeng ki VDP bad ki PLV ka la pynkhlaiñ shuh shuh ïa ka jingïada paidbah bad ka jingwanrah ïa ka bishar hok khamtam ïa kiba duk.
Lyngba kane ka sensitization programme, ka District Legal Services Authority bad ka Pulit ki la pynpaw ïa ka jingkloi ban kyrshan ïa ki VDP bad ki PLV kum ki nongïatreilang ban wanrah ïa ka shongsuk, shongshngaiñ bad ka jingshakri aiñ kaba kham jan sha ki paidbah, na ka bynta ban tei ïa ki shnong ki thaw bad ban skhem ha ka imlang sahlang.
