Mawkyrwat, ‘Nailar 27 : Ka FKJGP South East Khasi Border Circle hapoh ka jingïalam u President u bah Kyrmen Shangdiar, hadien ba ka la leit jurip halor ka jinglong jingman jong ka surok na Weiloi sha Balat haduh ka jingkieng Umpung, ka la pynpaw ïa ka jingsngewkhia bad ka jingsngewkitkhlieh halor ka jingeh ba u paidbah u ïa kynduh namar ka jingduh jingïarap kaba khraw na katei ka surok kaba la sniew palat.
Na ka liang ka seng, hadien ba ka la ïoh ban sakhi da ka jingjurip, ka la leit ban pynsngew ïa kane ka jingeh sha u Block Development Officer (BDO) jong ka Mawsynram C&RD Block ba un shimkhia mardor. Ka seng ka pynkynmaw ruh ba ha ki snem bala dep, ha u bnai Jylliew, ka la dep ban pynsngew ïa kine ki juh ki mat sha u Deputy Commissioner, East Khasi Hills, bad mynta sa shisien ka hap ban pynpaw biang ïa kane ka jingeh sha u BDO Mawsynram.
Ka seng ka dawa ruh ba ki truck kiba kit Coke kin iaid tang da ka por bad ym palat 10 tylli ha ka shi sngi (kiba kiew bad kiba hiar). Ka seng ka maham ruh ba ki truck kim dei ban kit palat pud lane tam ïa ka 9 ton kumba la buh kyrpang da ka PWD Mawsynram Division lyngba ki signboard.
Nalor kata, ka seng ka kyntu ruh ba dei ban peit bniah bha ha ki Weight Bridge bad ki Check Gate khnang ba ka leit ka wan jong u paidbah kan long kaba suk bad khlem jingeh.
