Nongpoh, Risaw 25: U Senior Superintendent of Police ka Ri-Bhoi District u la maham da kaba tyngeh ïa baroh ki trok kiba ju mlien ban ieng ha shilynter u surok bah National Highway naduh Byrnihat shaduh Jorabat kaba ju wanrah ka jingdheng kali kaba jur bad buh jingeh ïa ki paidbah ba leit ba wan khamtam ki ba donkam kyrkieh kum ki Ambulance.
Kum ban shu kdew ba u SSP ka Ri-Bhoi hynnin ka sngi u la hiar hi dalade sha ka thaiñ Jorabat ban pynher krad naphang ïa ki trok kiba ju ieng ha katei ka jaka mar shiteng u surok khamtam ka dei ka jaka kaba khapngiah ba ki paidbah ki rung ki mih na ka jylla.
Na ka liang u SSP u maham ruh da kaba tyngeh ba ki trok kim dei shuh ban ieng ha katei ka jaka, watla ka don ka No Entry sha Guwahati hynrei ki kali ki dei ban ieng sha ki thaiñ Sonapur kaba dei ka surok ka bym da khapngiah than bad ynda la lait ki sa lah ban phai biang na katei ka jaka ban rung sha Guwahati.
Lah ruh ban kdew hangne na ka liang ki pulit ka Ri-Bhoi tang hapoh 3 kynta ka jingtalasi ïa ki kali ki la ïoh ban daiñ kuna kumba 5 lakh na ki trok bad kynthup ruh ki kali pynkheiñ aiñ naduh ki 4 sha ka haduh ki 2 sha ka bad kane ka jingtalasi kan dang bteng ha kine ki khyndiat sngi ban pynthikna ba ka leit ka wan ka dei ban shngaiñ ïa ki paidbah ban pynduna ka jingjia aksiden.
