Ki trai jylla kim ïohkam ha ki karkhana, pyrshah ka HITO ïa ka public hearing ka Meghatop

Jowai, Risaw, 11: Ka Hynñiewtrep Integrated Territorial Organization (HITO) Narpuh Circle, ha ka sngi Sngi Palei mynta ka taiew ka la phah da ka jingthoh sha ka Meghalaya State Pollution Control Board (MSPCB) lyngba u Deputy Commissioner (DC) ka East Jaiñtia Hills District u Shivansh Awasthi ban pynpaw ïa ka jingpyrshah halor ka jingthmu jong ka M/s Meghatop Cement Pvt Limited ban pynlong ïa ka Public Hearing ha ka tarik 18 Risaw 2024 na ka bynta ban tei ïa ka karkhana pynmih dewbilat (Integrated Cement Plant of capacity 3.3 MTPA Clinker, 2.8 MTPA Cement bad 16MW Waste Heat Recovery System) ha shnong Wahïajer Narpuh, East Jaiñtia Hills District.
Lyngba kane ka jingthoh ba la soi da u President bad u General Secretary, ka HITO Narpuh Circle ka la pynpaw ïa ki nongrim ba ka seng ka pyrshah dei namarba ka jingtuid jong ki bar jylla ha East Jaiñtia ka long kaba lah ishyrkhei bad kaba lah ban buh jingma ruh hadien habud bad ka ban sa ktah ïa ka kamai kajih jong ki pateng ki ban sa wan, lada ki mynder ki ïoh knieh lut ïa ka khaïi ka pateng jong kiba mynta bad ym slem shuh ka synshar khadar shnong ruh kan sa jot sa pra.
Ka Seng ka la ong ba ki kharkhana pynmih dewbilat kiba mynta ki don haduh 8 tylli tang hapoh East Jaiñtia District. Tang ïa kine kiba la don lypa ruh lah ïohi shai ba ki ladep ban pynjot bad pynjakhlia ïa ka mei mariang bad nalor kata ka jingkyrduh kam ka dang kiew na kawei ka por sha kawei pat. Kan myntoi aiu ban wanrah shuh shuh ne khambun ïa ki kharkhana pynmih dewbilat haba ïa ki jingeh lah ïoh mad da ki laiphew jait lai phew rukom, la ong ka seng.
Ïa ka thungkam thungjam ruh dang bun ki bar jylla ban ïa ki trai jylla, haba bun na ki kam ba ki briew trai jylla ki lah ban trei hynrei kine ki kharkhana ki wanrah pynban da ki bar jylla kumba ibein ikhoh ïa ka hok ki trai jaka. Katba dang ïaid ki sngi ka jingkyrduh um ha ka aiom tlang ka long kaba shyrkhei namarba ym don wah ym don khlaw shuh bad da ki phew jait ki jait jingpang lah nang roi, ka jingshit ruh ka dang ïai kiew ha man la ki snem.
Halor kine ki nongrim ka HITO ka la pyrshah jur ïa ka Public Hearing jong ka Meghatop Cement Pvt Limited. Ka seng ka la maham ruh ïa ka Sorkar ba kam dei shuh ban ai jingbit ïa kino kino kiba thmu ban tei karkhana pynmih dewbilat hapoh East Jaiñtia bad ka Sorkar ka dei ban pynsangeh noh ïa kane ka Public Hearing.
“Ngi tip ba don ki katto katne kiba kyrshan bad don ruh kiba pyrshah, hynrei ka jingpyrshah ka jong ngi kam dei ba ngi shun ïa ka jakpoh jongno re jongno, ka jingpyrshah jong ka seng hi ka dei beit katkum ki mat ba la kdew haneng,” ong u Vice President jong ka HITO Narpuh Circle.
Ki shnong kiba don ki karkhna pynmih dewbilat ki la dap sa tang da u pumpum. Kan bha ba ka sorkar kan wanrah da ka Training Centre ha East Jaiñtia ha ka jaka jong kine ki kharkhana pynmih dewbilat.
Ha ka training centre dei ban buh ïa ka jinghikai ha ka Electrical, Mechanical, Automobile bad ki Computer Courses khnang ba ki samla kin ïoh pyntbit ïalade ha kaba kin aplai kam ruh ha kine ki Cement Factory.
Ka Seng ka la jingai jingmut ruh ïa ka Sorkar, ïa ka Training Centre dei ban tei bad siew hi ïa ka jinglut jingsep da ki bor pynïaid jong ki karkhana pynmih dewbilat kiba la don lypa ha East Jaiñtia Hills District.