Ki surok ba jan kot 25 klur jurip u Bah Banteidor tuid ruh ki kam pynroi sha ki skul, jaka sumar & shnong

Shillong, Nailar 12 : Ka jingpyntrei ïa ar tylli ki projek surok kiba la mang jan kot 25 klur tyngka na ka Prime Minister’s Gram Sadak Yojana (PMGSY) -III, kata na Mawkynrew sha Pingwait ha ka lynter ba 5.60 KM bad kaba na Mawkynrew sha Nohron ha ka lynter ba 19 KM, ki la ïaid shaid shaid.
ïa ka surok na Mawkynrew sha Pingwait la mang 7 klur 20 lak tyngka katba ia ka surok na Mawkynrew sha Nohron pat la mang 17 klur 82 lak tyngka.
U Bah Banteidor Lyngdoh, MLA ka Mawkynrew ha ka 11 tarik u la leit ban jurip dalade ïa kitei ki surok ha ka jingïadonlang ki ophisar, ki nongïalam shnong lem kiwei-kiwei pat.
U MLA u la pynpaw ka jingsngew kmen ban ïohi ba kine ki ar tylli ki projek surok ki la ïaid sha khmat ban pynurlong ïa ka jingangnud ba la slem ki nongshong shnong ka thaiñ.
Ha shwa ka jingjurip ïa kitei ki projek surok, u Bah Banteidor ha kaba sdang jong katei ka sngi, u la leit ban jngoh shwa ïa ka jingshna Ïing Dorbar ka Shnong Thangsning.
ïa kane ka ïing Dorbar la mang tyngka 10 lak na ka Special Rural Work Programme (SRWP) bad khmih lynti ba shen yn pyndep noh ïa ka.
Nangne u MLA u la pynlong ka jingjurip ïa ka Holy Cross Higher Secondary School ha Mawkynrew ha kaba na ka skhim SRWP u la noh synñiang ban shna pynbha bad pynheh ïa ka nalor ki jingker ha katei skul.
U la leit jurip ruh ïa ka St. Joseph’s Health Centre, Mawkynrew ha kaba la ïakren ban pynbiang ïa ka surok bad kiwei pat ki jingdonkam.
Hadien kane, u MLA u la leit ban jurip sa ïa ka Jatah Primary Health Center (PHC) ha kaba la pynlong ruh da ka jingïalang pyrkhat bad ki Doctor ka PHC ha ka jingïadonlang ki nongïalam ka Synjuk Ki Dorbar Khadphra Shnong.
Hangne u Dr J Slong, Medical Officer Incharge ka PHC u la pynsngew ïa ki jingdonkam ba kyrkieh ka PHC kata ïa ka um bam, ki tiar jingsumar, ka bor ding elektrik, ka jingker nalor kiwei de.
Na ka liang u bah Pynskhem Mukhim, Chairman ka Synjuk u la aiti ruh da ka dorkhas ban dawa buh noh da ka Higher Secondary School ha katei ka thaiñ khnang ba kan ïarap shibun ïa ki nongshong shnong.
Haba ai jingkren u bah Banteidor u la kubur ban shimkhia ïa ki jingtyrwa jong ki bad kyrpad ba kin don ïa ka jingïaishah ba un lah ban pynurlong lut ïa ki jingdawa jong ki.
Halor ka skul ba la buh jingtyrwa ban buh ïa ka Higher Secondary School, u Bah Banteidor u la ong ba un ïakren bad ki bor pynïaid ka tnad pule bad ka jingtyrwa kaba shongnia ban suk ki khynnah pule namar ka thaiñ ka la kham jngai na Shillong.