Kiba bun nangi, khamtam kito kiba sah jngai na la ki jong kiba haïing hasem, ka jingpynlut por bad la ki paralok ka dei kaba don jingmut shibun ban rakhe hapdeng ki sngi shuti kaba long kawei na ki jingkyntiew ïa ka koit ka khiah. Ka jingïadei paralok ka long kawei kaba don jingïasnoh kaba kham pher kaba paw ha ka imlang ka sahlang kaba kyntiew ruh ïa ka koit ka khiah. La shem ba kane ka jingïadei paralok ka dei kaba lah ban ai jingmyntoi khambun halor ka koit ka khiah bad ka bhah ka miat jong u briew shimet haba ïanujor bad ki jingmyntoi bad ngi lah ban ïoh ha ka jingïadei bad la ki bahaïing hasem.
Ha kum kane ka por ba sakhi baka jinglong kynjah marwei ka dei kaba la kylla long ka jingeh kaba paw ka jingshah ktah ha ka liang ka koit ka khiah ha kiba bun ki samla bad la shem bad lap ba kine baroh ki mih na ka daw ka jingduna halor ka jingdon jingïadei ha ka jinglong paralok haba ïanujor bad ki pateng ba la leit. La kdew baka jingïadei bad ïajan paralok ka dei kaba lah ban pynduna ka jingshah banbor ka jingmut jingpyrkhat, ka pynjur ka jinglongkmen bad kyntiew halor ka jinglong shaniah bad skhem jingmut halade.
Hapdeng ka jingbeh por bad beh kam, ka jingpynlait por ban maramot bad tei ha kane ka jingïadei ka long ka jingtynjuh kaba khraw. Hynrei lyngba kine ki sngi shuti ki dei kiba lah ban pynthymmai halor kine ki jingïadei bad ailad ban nang pynjanai ha ka jingïadei paralok,Ki katto katne ki lynti kiba lah ban kyntiew halor ka jingïadei paralok – Ki jingpynpaw ka jinglong sbun; ki don bun ki briew kiba shah banbor ka jingban khia jingmut jingpyrkhat na ka daw ka jingpyrshang ban thied ki jingai sngewbha kiba don jingmut na ka bynta ki paralok jong ki. Ki don ruh kiba mad ka jingkhuslai haba ki pyrkhat shaphang ka pisa tang la poi ki sngi shuti, bad ki don ruh kiba shem jingeh halor ka jingwad ki jingai sngewbha kiba kynsai.
Hapdeng kine ki jingeh ba phi lah ban mad phi donkam ban pyrkhat ban ai sngewbha ïa la ki paralok kaba ym kynthup shuh da ki tiar, hynrei ka jingpynpaw ka jinglong sbun. Wat khyndiat ka jingpynpaw bad jingpyni dak ha kane ka liang ka dei kaba lah ban wanrah shibun ka jingïapher. Phi lah ban phah da ka voicemail kaba ktah ha ka jingsngew ki paralok jongphi, ka jingpyrkhat bad pynkhreh halor ka jingpynlut por lang bad la kijong ki paralok.La kdew ba kum kine ki jingpynpaw ki dak jong ka jinglong sbun ka dei kaba lah ban kyntiew ka jinglong kmen bad ka bha ka miat halor ka jingsngew jongngi. Ki dak ba pynpaw halor ka jinglong sbun bad bha ki dei kiba lah ruh ban pynmih ki oxytocin, ki hormone kiba paw halor ka jingdon ka jingkitkhlieh halor ka jingdon jingïadei ha ka imlang ka sahlang.
Pdiang ba don ka jingïapher: Ha ka jingkynduh paralok ym lah lait ne kiar satia na ka jingkynad bad ka jingïapher jingmut hapdeng ba ïakren ha kiba bun ki mat la ka long ha ki kam saiñ hima sima ne kiwei pat ki matpdeng lada phi mad kum kane ka jingïapher jingmut phi donkam ban pynpaw kaei kaba phi sngew bad don halade, bad klet noh kaei kaba la jia.
Ka long kaba donkam ban pdiang ba phin ym jop satia ha ka jingïatai ne lah ban pynkylla ka jingmut ba kiwei pat ki don. Phi donkam ruh ban kylli halade. Phi kwah ban long kiba kmen ne kiba kren ïa kaba dei.
Ka jingthoh shithi: Ha kine ki sngi shuti ka jinglah ban kynduh bad lum lang shi jaka bad la ki paralok ka dei kaba baroh ki sngewtynnad bad long kmen. Hynrei ka don pat ka por ba lehse ngim lah satia ban leh kumne lada ngi dei napdeng kito kiba sah jngai bad la ki jong ki paralok. Hynrei wat ha ka jinglong jngai ka met phi lah ban wanrah ka jinglong jan ha ka jingsngew da kaba phi thoh da ka shithi kum ha ki por ba la leit.
