Shillong, Naitung, 18: U Director jong ka School Education & Literacy (SE&L) Bah Banteilang J. Kharshandi ha ka sngi Thohdieng u la pynmih ïa ka jingpynbna paidbah kaba bthah ïa baroh ki skul bym pat ïoh jingithuh ha ka jylla ba ki dei ban aiti ïa ki aplikeshon na ka bynta ban ïoh jingithuh hapoh ka Right of Children to Free and Compulsory Education (RTE) Act, 2009.
U Bah Kharshandi u la ong ba ki skul kiba shu treikam khlem ka jingïoh jingithuh ba pura ki dei ban aiti ïa ki aplikeshon jong ki ha ka Form 1 sha ki District School Education Officer (DSEO) bapher bapher hapoh hynriew bnai.
Ki skul ki dei ban ïoh ïa ka jingithuh kaba pura na ka bor ba dei peit hapoh ka por ba la buh ban bteng ïa ka jingtreikam.
Lada kim lah ban ïoh ïa ka jingithuh hapoh hynriew bnai ki skul ki lah ban shah khang khyrdep, bad ym shah ban treikam hadien kata, la maham u Director.
Ha katei ka jingpynbna la kdew ruh ba yn nym shah ban plie ïa kino kino ki skul thymmai khlem da ïoh ïa ka jingithuh shwa na ka Sorkar.
La kyntu ïa ki bor pynïaid skul ba kin leit sha ki ophis DSEO kham kloi ban ïoh noh ïa ka jingithuh.
