Mairang, Naitung, 11: U MP ka 1-Shillong konstitwensi u Dr A.J Syngkon ha ka sngi Thohdieng u la don lang ryngkat bad pynïaid ruh ïa ka jingïalang bishar bniah jong ka District Development Coordination & Monitoring Committee (DISHA) ha Circuit House Mairang, ban bishar ïa ka jingpyntreikam ïa ki skhim sorkar pdeng bapher bapher hapoh ka District.
Ka jingïalang ka thmu ban pynthikna ïa ka jingpyntreikam, ka jingpynpoi hok ïa ki skhim pdeng, ka jingpyntreikam ha kaba shai bad ka jingïadei bad ki jingdonkam jong ki paidbah.
Ha kane ka jingïalang la sakhi ïa ka jingdonlang jong ki katto katne ngut ki heh sorkar ba kynthup ïa ka Deputy Commissioner ka kong A.Kharpor, u MDC ka Pariong-Mawthadraishan konstitwensi u bah Powell Sohkhlet, u Additional Deputy Commissioner cum Project Director u bah A.Nongbri MCS ryngkat ki heh ophisar na ki tnat sorkar bapher bapher.
Ha ka jingïalang kaba la neh baroh shi sngi, ki ophisar jong ka District na ki tnad sorkar bapher bapher ki la ai ïa ki kaiphod halor ka jinglong jingman jong ki projek sorkar pdeng kiba kynthup ïa ka PMAY Grameen, MGNREGA, RGSA, MSSDS, MPLADS, PMFBY, RKVY, Swachh Bharat Mission, National Social Assistance Programme bad kiwei kiwei.
Ki la ai ïa ka kaiphod ha kaba ïadei bad ki skhim kiba la lah ban pyndep, kiba dang ïaid ha ka jingpyntrei, ki jingeh kiba ki ïakynduh, kumjuh ruh ki plan thymmai na ka bynta ka ban sa wan.
U MP Lok Sabha u la ban jur ba ki skhim jong ka sorkar ki dei ban ai jingmyntoi ïa uwei pa uwei u nongshong shnong bad u la pynshlur ïa ki ophisar ban shakri da ka jinglong hok, ka jingkitkhlieh bad kaba khuid.
U la pynpaw ruh ïa ka thong jong ki nongïalam ka ri India ban pynlong ïa ka ri India kum ka ri ka ban sa kiew ha ki liang baroh tad ha u snem 2047. U la ban jur ïa ka jingdonkam ban ïatreilang ban pynurlong ïa kane ka thong.
