Ki shipara ki la leh beijot ïa ka kmie jongngi, ngin ïalap elekshon pyrshah ïa ka MDA

Nongpoh, Nailur 22: Ka Seng Hynñiewtrep Integrated Organisation (HITO) ka la ther tyngeh ïa ka sorkar MDA, ha kaba ka la ther tyngeh khamtam ïa arngut ki shipara u Conrad Sangma bad u James Sangma.
Haba kren ha ka jingïalang kaba la pynlong hadien ba ladep ka jingïaid paidbah da ki kali na Lad Umsaw sha 14 Mer, u President ka Seng, u Bah Donbok Dkhar, u la ong ba kine arngut shipara ki la leh beiijot ïa ka Bri u Hynñiewtrep kaba long kum ka kmie jong ngi.
“Kine arngut shipara ym tang ba ki la leh khlem akor, hynrei ki la batbor syndon ïa ka kmie jong ngi”, la ong u Bah Donbok.
U hehduh ka Seng, u la pynbna paidbah ruh ha kane ka jingïalang ba ka HITO kan mih shakhmat ban ïalap elekshon pyrshah ïa ka sorkar MDA, namar ki kam kiba ka la leh pyrshah ïa ka jaidbynriew.
U Bah Donbok u la ther tyngeh ruh ïa u Myntri Rangbah Symbud, u Bah Prestone Tynsong u bym tip wat tang ïa ka aiñ kaba u thaw hi, kata ka Meghalaya Regulation of Gaming Ordinances 2021, ha kaba ha ka kyndon kaba 3, ka la pyllait ïa ka jingthoh tim, katba u Bah Prestone pat u long balei ym ïa pyrshah ïa ka jingthoh tim.
Haba ther tyngeh ïa ka sorkar kaba wanrah ïa kane ka aiñ khalai ha ka jylla khamtam ïa ka jingthmu ban buh ïa ka Casino ha Khanapara, u Bah Donbok, u la ong ba ka jylla kam kwah ban kharoi ki kam sniew kum ki thei nuti, ki kam khalai, hynrei ka jylla ka donkam ki jaka pule kum u Medical College bad kiwei kiwei.
“Ko sorkar MDA wat pynlong ïa ka jylla kaba shen kan shah thang kum ka Sodom bad Gomorah”, u la ong.
Ha shuwa jong kane, ka HITO kum ka dak ka jingpyrshah ïa ka aiñ khalai, ka la pynlong ïa ka jingïaid rally da ki kali na Lad Umsaw da kaba thmu ban pynlong jingïakhih hakhmat ophis u Syiem Raid Marwet. Hynrei hajan Umling, ki la shah khang lynti noh ha ki Magistrate bad ki Pulit. Kane ka jingshah khang lynti ka la pynbitar ïa ki dkhot ka HITO ha kaba ki la shong ha surok ban pakhang noh ïa ka surok, tangba ki la pyllait pat ïa ki kali kit nongpang. Hynrei kane ka jingsahkut kali ka neh tang kumba shi kynta eiei ha kaba na ka liang ki Magistrate ki la shah ïa ki dkhot ka Seng ban ïaid tang haduh 14 Mer, namar ba ka jingpyrkhing ki Pulit Assam ba wan u Vice President ha Assam.
Ki dkhot ka HITO ki la wan phai noh ha Byrnihat ha kaba ki la pynlong ka jingïalang bad thang ïa ki tyngshop jong baroh ki 12 ki Myntri jong ka sorkar MDA.
Ha kane ka jingïalan u Bah Donbok, u la pynbna ruh ba ka Seng kan pynlong sa ka jingïalang paidbah kaba heh ha nongbah Shillong katba ka sorkar kam pat pynduh pyndam ïa kane ka aiñ. U la ong ba ka Seng kan ïeng ïaleh haduh kaba kut wat lada dei ban aiti la ka jingim ruh ki kloi ban aiti.
Kumjuh ruh ki 4 tylli ki seng ba kynthup ïaka HANM, MPUF, RBYO bad MPSO mynta ka sngi kila hiar sha ka thaiñ Khanapara ha Ri Bhoi ban leit jurip ïaka jingtei ïaka ktem khalai ne Casino kaba la iaid shaid shaid ha Ri Bhoi District, ba kum ki kynhun seng kila pynpaw ka jingpyrshah jur bad kim lah shuh ban shanñiah ïaka sorkar kaba la shu kular tang ka ktien ban pynsangeh ïa katei ka ktem khalai katba 3 ngut ki briew kila ioh ïaka license ba shipor ban buh ktem khalai.
Ha katei ka jingleit jong kitei ki kynhun seng kiba thmu ruh ban leit peit bad khmih haduh katno ka jingtei ïa katei ka ktem khalai pynban la lap ba ka khyrdop jong katei ka ktem khalai kala khang khyrdep bad kim shym la ioh ban rung shapoh ha kaba kila sdang ban pynpra ïaka khyrdop bad dei hadien ka jingïakren bad ki bor pulit ba kitei ki kynhun seng kila sangeh bad shu pynlong tang ka jingïarah placard bad pynpaw ïaka dak pyrshah halor ka Casino ha Ri-Bhoi.
Kum ka jingai mynsiem bad ka jingpynshngaiñ ïa kitei ki kynhun seng kiba la hiar sha katei ka jaka naka liang u Bah George B Lyngdoh MLA ka Umroi ba dei ruh u Chief Whip ka liang pyrshah u la hiar sha katei ka jaka ban don ryngkat shipor bad kitei ki kynhun seng ha Khanapara shuwa ba un leit pat ban beh ïa kiwei kiwei ki kam.