Ki sengbhalang ki lah ban ïakhih pyrshah hynrei kim dei ban tam ïa u pud ka aiñ: Bah Paul

Shillong, Risaw, 24: U Myntri ka tnat Social Welfare u Bah Paul Lyngdoh ha ka sngi Palei u la ong ba ki sengbhalang ki long kiba laitluid ban pynpaw ïa ki jingpyrshah ne ban ïakhih pyrshah katba kim tam ia u pud jong ka aiñ.
“Ngim don eiei ban ong bad ngam don ruh kano kano ka jingeh bad ki sengbhalang katba kim pat tam ïa u pud jong ka aiñ,” ong u Bah Lyngdoh sha ki lad pathai khubor.
Kane ka jingkren jong u ka long halor ka jingthmu ban pynlong jingïaid pyrshah da ka Hynñiewtrep Youth Council (HYC) sha main secretariat ha ka 8 tarik u Naiwieng, halor ka jingpulom ka sorkar ban pyntreikam ïa ki 7 tylli ki mat bad jingdawa ban tehlakam ïa ka jingkiew ki kam dih bad kam khaïi drok ha ka jylla.
“Hynrei sa shisien nga banjur ba ki sengbhalang ki long laitluid ban pynlong ki jingpyrshah ne ki jingbym sngewhun hynrei kim dei ban tam ïa u pud ka aiñ,” ong u Bah Lyngdoh.
Haba ong ba ka Shillong kadei kawei na ki jaka ba ju wan ki nongwan jngohkai na kane ka ri, na ka liang u Myntri ki kam jngohkai u la ong, “Ngi don ka burom kaba khraw na ka bynta ka jylla bad ka Shillong ban long kum ka jylla kaba don ïa ka thong ban khring ïa kiba wanjngohkai ha u snem 2025, kan don ka jingkiew ha ki kam phutbol ka ban long 70 percent ha kaba bun na ki riew ieid phutbol kin wan jngoh ïa ka Meghalaya. Kumta kine ki briew kin wan na ka bynta jong no bad na ka bha ka miat jong no, kumta ka long kaba donkam bha ba ngim dei ban shah ïalam da ki jingsngew bad ki kam ïa isih.”
Haba ong ba ka long kaba donkam ban pynkhlaiñ ïa ki pulit ka jylla da kaba aibor shu shuh ïa ki, u Bah Lyngdoh u la ong, “Kawei na ki kadei ka ANTF, kaba nga la dep ban ai jingmut sha u Symbud Myntri Rangbah ka jylla u ba khmih ïa ka tnat Pohïing (home police).”
U la pynpaw ruh ba ka kam khaïi drok bad ki kam dih drok ka dei ka kam kaba don jingma bha bad ka long kaba eh ïa u kum u Myntri ban ïathuh lut ïa baroh ki jingtip ba bniah bad ki paidbah.
“Kane ka kam kadei ruh kaba don bynta da kiba bun ki shark, kiba dei kiba la tbit ha kane ka kam khaïi drok. Ngin hap ban lap ïa kiba rieh tngen, ngi donkam ban sdang ki kam pynduhjait naduh ka jaka ba wan ka jingsam ïa u drok. Kine baroh ki dei ki jingtip kiba don jingma. Kat kaba la leh ngim lah ban ïeng na ka tnup ka secretariat bad ban ïathuh briew ïa baroh ki kam bad ki plan ki jong ngi,” ong u Myntri da kaba bynrap, “Ba ngi dei ban don ha ka kyrdan ban ïakhun ïa kane ka jingeh ym kumba long ha ki por kiba mynshwa.”