Ki Seng Saiñpyrthei ki dei ban ïatreilang ban rat dyngkong ïa ka jingkyrduh bording ; ong u Bah Ronnie V. Lyngdoh

Shillong, Jylliew 11 : U Nongïalam ka Liang Pyrshah u bah Ronnie V Lyngdoh u la khot bad ïawer ïa baroh ki Seng Saiñ Pyrthei ha ka jylla ban ïatrei lang na ka bynta ban wad ki lad ki lynti kumno ban rat dyngkong ïa ka jingkyrduh bording ha ka jylla.
U bah Ronnie u la ong ba kane ka jingkyrduh bording kam dei kaba mih ne long tang ha kane ka sorkar ba mynta bad kam dei ruh ban tei pop ruh ïa ki sorkar kiba mynshwa. “ Hynrei ïa kane ka mat ba kongsan tam donkam ban ïamir jingmut lang da baroh ki seng saiñ pyrthei khlem da don ka jingsngew party la ngi don ha ka Liang Synshar ne ka Liang Pyrshah ruh” ong u bah Ronnie haba kylli halor kane ka jingkyrduh bording.
U la ong ba ka por ka la dei ban sangeh noh ïa kine ki jingïakynoh mar kylliang hynrei ban ïatrei lang bad wad ki lad kumno ba kane ka jingkyrduh bording kan duh kan dam noh syndon ha ka jylla.
“ Ka por ka la dei ba ngin shim ka jingkitkhlieh da man la ki seng saiñ pyrthei. To ngin sangeh ka jingïakdewkti mano ba don ha ka bor bad mano bym don namar ngi baroh ngi don ka jingkit khlieh. Kumta ka la dei ka kamram jong ngi ban ïamir jingmut lang da kiei ki lad ki lynti ba ngin leh ban wanrah ka jingpahuh bording ha ka jylla. Ka long kaba suk eh ban kynnoh hynrei to ngin ïatrei lang ryngkat ryngkat ban wad ki lad ki lynti ym ban ïakdew kti ne ïa kynnoh halor kane ka jingeh” ong biang u bah Ronnie.
U la ong ba ka jylla Meghalaya kumba ka long mynta ka shaniah tylli beit tang ha ka bording ba pynmih da ka um ne ka Hydro Power Project bad da kine ki jingkylla ka mariang bad ba ka jinglong ka suiñbneng ruh ym ithikna shuh ka jylla mynta ka donkam ban wad da kiwei pat ki lad ki lynti ban pynmih bording.
U la ong ka jingdonkam bording ka la kiew bha ha ka jylla namar ki nongshong shnong ki la nang bun bad baroh baroh la ïa pyndonkam mobile phone, TV, Laptop, Compurter, Refrigerator, AC, shet jingshet, tiew um sum bad ter ter.
“ Lada ngi phai sha ki Hydro Power Project kan shim por bha hynrei nga tharai ki don kiwei ki lad kiba kham kloi kum ka Solar Energy, Wind Energy, bad kiwei kiwei” ong u bah Ronnie. “ Nga da sngewkmen shikatdei eh ba ngi ïoh ïa u myntri pynmih bording uba pyrkhat wat ïa ka Thermal Power Plant ruh, nga tharai kin don ki Gas PipeLine ki ban ïaid lynti lyngba ka jylla jong ngi. Lada ngi lah ban pynmih bording na ka Gas ruh kan ym don jingktah ïa ka mariang” ong u bah Ronnie. U la ong ïakine lah ban pyntreikam hapoh ki saw san snem katba ïa ki power project kan shim por da ki snem lynter ban pyndep kat haduh ban da ïoh pyndonkam.
U la pynpaw ka jingkyrmen skhem hapoh ka jingpeit jingkhmih une u myntri pynmih bording mynta yn sa lah ban ïoh ka jingpynmih bording da kiwei ki lad ki lynti ki ban ïarap ïa ka jylla ban lait na ka jingkyrduh bording.