Shillong, Jymmang 03 : Watla ka elekshon sha ka Iing Dorbar Thawaiñ ka jylla ka dang don sa kumba 9 bnai ei ei, hynrei ka jingïabeiñ ïakhoh wat hapdeng ki party ba don lang ha ka sorkar MDA ruh ka la sdang mynta.
Ha ka jingïalang jong ka NPP kaba long ha Saitsohpen ha kane ka sngi Saitjaiñ, u National Vice President ka NPP ba dei ruh u Symbud Myntri Rangbah ka jylla, Bah Prestone Tynsong u la ong ba ha Meghalaya ki don bun bha ki party riewlum hynrei kitei ki shu kut beit tang hapoh ka jylla hi.
Da kaba kam ba ka NPP ka la dei mynta kawei na ki party ba la ïoh jingithuh kum ka National Party, u Bah Prestone u la ong ruh ba ka party jong ki ka don ruh la ka jong ka ophis kaba heh ha nongbah Delhi kaban peit bad ïarap wat ïa kito ki nongshong shnong kiba wan na ki jylla jong ka thaiñ shatei lam mihngi jong ka Ri kynthup lang ïa kiba na Meghalaya.
U ong ruh ba lada nujor bad ki party riewlum, ym don shuh ba ithuh ïa ki tang shu tam ïa ka Guwahati khlem ïa kren shuh haduh Delhi lei lei.
“Phi tang shu poi ha ophis NPP la don ka dur kaba heh bha jong u Conrad Sangma, ka dur u Bahduh Prestone ruh ka don hangta. Ym don dur jong kiwei kiwei, phi ong ka HSPDP ne ki UDP….. tang iwei i poster rit ruh ym don hangtei hynrei tang NPP,” u la ong.
Kumban shu kdew hangne, hapoh ka sorkar MDA ki don bun ki kynhun kiba khleh khaw lang kynthup naduh ka NPP, UDP, HSPDP, PDF, BJP, KHNAM, NCP bad MLA shimet.
