Nongpoh, Rymphang 19: Haba kren haka jingïalang paidbah ha Umroi Nongrah mynta ka sngi u Bah Rangkynsai Kharbuki u ba dei u kyrtong ka NPP u la pynpaw ka jingsngewsih bad sngewdiaw hadien ba uwei u riew rangbah naka shnong Nongrim Nongladaw u la thad paidbah ïaka jingkren phone hapdeng u Bah Bandari Ryntathiang bad u Paiem Ainam Syiem Syiem ka Hima Mylliem haka rynsan ïalap elekshon kaba dei ruh ka rynsan ïathir bala pynlong da ka Synjuk ki 5 shnong haka shnong Liarsluid dang shen.
U Bah Rangkynsai u la ong ruh ba u dieng ba bun ki soh u shah kawang bun ki maw, bad kane ka jingthad ïa u shuwa ka sngi thep vote ka dei tang ban pynbudnam bad pynjah burom, hynrei kum u MDC bala jo par sien na Umroi ngam tieng ngam riej bad nga ieng skhem halor ka nongrim namar barabor u dien hi ba khlem soh ym don satia ba peit, hynrei ïa u dieng ba mih bun ki soh, ka jingshah kawang maw ruh ka long kaba shyrkhei naka diang bad mon.
U la ong ruh hadien bala mih haki lad pathai khubor halor ka jingthad u Rangbah ïaka jingïakren phone, bun naki paidbah kila phone sha u ban wad jingtip hynrei u la ong ba ka dei tang ka kam pynjah burom shuwa ka sngi thep vote bad bun naki paidbah kila phah pynphai ktien halor katei ka jingkynthoh hynrei kum u MDC u la ong ba kata kam dei ka lynti ban ïakhun.
Kum u MDC ka Umroi u la ong ruh ba ha kine ki 6 snem bala leit u la leh shibun ki kam naka bynta ki paidbah ka Umroi Constituency, bad u dang angnud ban leh shibun ki kam, khamtam ban pynneh pynsah ïaka riti ka dustur, ka khyndew ka shyiap bad ka kolshor bala buh naduh u longshuwa manshuwa.
Namarkata u la kyrpad sha ki paidbah ba ki dei ban sngewthuh shai namar lada ki kwah hi ka jingkylla dei tang ka NPP kaba lah ban trei naka bynta ki paidbah, namar haki bun snem bala leit noh haka jingshakri kiwei ki party kim shym lah ban trei eiei hynrei tad haduh ka jingshimti ka NPP ba ki paidbah ki iohi ïaka jingkylla la ha ka sorkar jylla bad District Council.
